काठमाडौं , १३ असार । भारतमा कोरोना भाइरसको अवस्था भयावह बनेको छ । एकैदिन १८ हजार २७६ नयाँ कोरोना संक्रमित थपिए सगै कुल संक्रमित संख्या ५ लाख ९ हजार ४४६ पुगेको छ ।

कोरोना संक्रमणबाट मृत्यु हुनेको संख्या १५ हजार ६ सय ८९ पुगेको छ । संक्रमण फैलिएपछि कतिपय राज्यहरुले पुनः लकडाउन कडा पारेका छन् ।

भारतमा अहिले लकडाउन खुकुलो पारिएको छ । शैक्षिक संस्थान र मनोरञ्जन स्थलहरु खुलेका छैनन् । अन्य क्षेत्र भने खुलाइएको छ । यसैवीच भारतिय प्रधानमन्त्री भारतका प्रधानमन्त्री नरेन्द्र मोदीले कोरोनाभाइरस विरुद्धको खोप नबन्दासम्म सामाजिक दुरी कायम गर्ने र मास्क लगाउने नियमलाई कडाईका साथ कार्यान्वयन गर्नु पर्ने बताउनु भएको छ ।

कोरोनाभाइरसको सङ्क्रमणबाट बच्नका लागि हरेक व्यक्तिले “दुई गजको दुरी” भन्ने नियमलाई ध्यान दिनु पर्नेमा उहाँले जोड दिनुभयो ।

कोरोनाका कारण विश्वभरी नै धेरै पक्षमा संकट ल्याएको बताउदै उहाँले यसलाई अवसरको रुपमा उपयोग गर्नु पर्नेमा जोड दिनुभयो ।

प्रधानमन्त्री मोदीले सामाजिक रुपमा पनि यसले धेरै उथलपुथल पारेपनि सतर्कता अपनाउदै अगाडी बढ्नु पर्ने धारणा राख्नुभयो ।

“हामी सवै अहिले तलमाथी भएका छौँ, हाम्रो सामाजिक जीवनमा धेरै समस्या आएको छ, तर पनि हामी अब अगाडी बढ्नु पर्छ,” उहाँले एक कार्यक्रममा भन्नुभयो ।

यो समयमा यस समस्याबाट प्रभावित नभएको संसारमै कोही नभएको बताउदै उहाँले यसको समाधानका उपायहरुको खोजी भइरहेको जानकारी दिनुभयो ।

यो रोगबाट कहिले मुक्ति पाइन्छ भन्ने थाहा नभएकाले यसको विरुद्धको खोप पत्ता नलाग्दासम्म सामाजिक दुरी कायम राख्ने, मास्कलगाउने लगायतका आधारभूत सतर्कताहरु अप्नाउनुको विकल्प नभएको उहाँको भनाई छ ।