काठमाडौँ –  २८ बैशाख । भारतले कालापानी क्षेत्रमा बाटो बनाएको विरोधमा माइतीघरमा शान्तिपूर्ण प्रदर्शनका लागि भेला हुन पुगेका कानून व्यवसायीलाई  प्रहरीले पक्राउ गरेको छ । यी प्रदर्शनकारीहरुलाई अहिले भृकुटीमण्डपस्थित नेपाल पुलिस क्लबमा राखिएको छ ।
पक्राउ पर्नेमा वरिष्ठ अधिवक्ताहरु, बालकृष्ण न्यौपाने, सुरेन्द्र भण्डारी, अधिवक्ताहरु नारायण घिमिरे, कञ्चनकृष्ण न्यौपाने, रमेशकुमार केसीलगायत रहेका छन् ।
भारतले कैलाश मानसरोवर यात्राका लागि,नेपाली भूमि लिपुलेक समेत मिचेर लिंक रोड बनाएको छ । उक्त लिंक रोडको शुक्रबार उद्घाटन गरिएपछि , नेपालमा विरोध भइरहेको हो ।अहिले कोरोना भाइरसको संक्रमण फैलिन नदिन सरकारले देशव्यापी रुपमा लकडाउन जारी गरेको अवस्था छ । यस्तो अवस्थामा पनि भारतले नेपाली भूमि मिचेर सडक निर्माण गरेको विरोधमा काठमाडौंमा प्रदर्शनकारीहरु सडकमा निस्किरहेका छन् ।
यसअघि आइतबार बिहान नयाँ बानेश्वरस्थित संसद भवन अगाडि विरोधमा उत्रिएका युवा विद्यार्थीलाई पनि पक्राउ गरेको थियो ।
भारतले धार्चुला हुँदै नेपाली भूमि लिपुलेक–कालापानीको जमिन समेत प्रयोग गरी सन् धेरै अधि देखि नै बाटो बनाउदै आएको छ । अन्तर्रा्ष्ट्रिय कानून अनुसार सीमा विवाद मिलाउनु पर्ने मागसहित विरोधमा उत्रिएको वरिष्ठ अधिवक्ता डा. सुरेन्द्र भण्डारीले बताएका छन् ।