हेटौंडा, १८ बैशाख । मकवानपुरमा तेल बोक्ने ट्यांकरमा लुकाइ छिपाई नेपाल भित्राउदै गरेको लागु औषध सहित २ जनालाई प्रहरीले पक्राउ गरेको छ।

पक्राउ पर्नेमा मकवानपुर थाहा नगरपालिका–४ घर भइ हेटौंडा ४ डेरा गरि बस्ने ट्याङ्कर चालक ३३ बर्षीय मान बहादुर थोकर र हेटौंडा ४ का ४५ बर्षीय सेते लामा रहेको प्रहरीले जनाएको छ । भारतको रक्सौलबाट तेल बोकेर काठमाडौं जादै गरेको ना ३ ख ६४६६ नम्बरको टयाङ्करबाट बुधबार राति लागु औषध बरामद भएको मकवानपुरका प्रहरी उपरीक्षक सुशीलसिंह राठौरले जानकारी दिनुभयो ।

इलाका प्रहरी कार्यालय पशुपतिनगरका प्रहरी निरीक्षक अरुण कुमार कुशवाहाको टोलिले हेटौंडा १५ रातोमाटेमा जाचका क्रममा तेल निकाल्ने लकिङ्ग बक्समा लुकाएको अवस्थामा १५५ बोतल विनसिरेक्स बरामद गरेको हो।

पक्राउ परेका उनिहरुलाई लागु औषध नियन्त्रण ऐन अन्तर्गत अनुसन्धान प्रक्रिया अगाडि बढाइएको प्रहरी उपरीक्षक राठौरले बताउनुभयो । लकडाउनको अवधिमा यस अघि अत्यावश्यक भन्दै दुध बोकेको अटो र स्कुटरबाट घरेलु मदिरा बरामद गरेको छ । मकवानपुर प्रहरीले लकडाउनका समयमा लागु औषध कारोबार र ओसारपसार बढन सक्ने भन्दै लकडाउनमा गुडेका सवारीको चेकजाँचमा कडाइ गरेको समेत प्रहरी उपरीक्षक राठौरले जानकारी दिनुभयो ।