काठमाडौं, १३ चैत । जी ७ राष्ट्रको संयुक्त वक्तव्यमा ‘वुहान भाइरस’ शब्द राख्ने अमेरिकी प्रस्ताव अन्य राष्ट्रले अस्वीकृत गरिदिएका छन् ।

अमेरिकाले कोरोना भाइरसलाई वुहान भाइरस भनिनुपर्ने र कोरोना भाइरस फैलनुको कारण चीन भएको आरोप अमेरिकाले आफ्नो वक्तव्यमा लगाएको थियो । जी ७ मा विश्वका ठूला अर्थतन्त्र भएका मुलुकहरु क्यानडा, फ्रान्स, जर्मनी, इटली, जापान, बेलायत र अमेरिका सामेल छन् ।

बुधबार जी ७ राष्ट्रका विदेशमन्त्रीबीच सम्पन्न भिडियो सम्मेलनपछि संयुक्त वक्तव्य जारी गर्ने कार्यक्रम राखिएको थियो । तर अमेरिकी विदेशमन्त्री माइक पोम्पिओले वुहान भाइरस शब्द राखिनुपर्ने बताएकै कारण संयक्त वक्तव्य जारी भएन । जी ७ राष्ट्रले पोम्पियोको भनाइ गलत भएको भनेर आलोचना गरेका छन् ।

यद्यपि जी ७ राष्ट्रहरु कोरोना संक्रमणविरुद्ध एक भएर लड्ने विषयमा भने सहमत भएको साउथ चाइना मर्निङ पोष्टले जनाएको छ । यसअघि अमेरिकी राष्ट्रपति डोनाल्ड ट्रम्पले कोरोना भाइरसलाई चिनियाँ भाइरस भन्ने गर्नुभएको थियो ।

तर विश्व स्वास्थ्य संगठनले जातीय र क्षेत्रीय हिसाबमा भाइरसको नामाकरण नगर्न चेतावनी दिएपछि ट्रम्पले कोरोना भाइरस नै भन्न थाल्नुभएको छ ।