काठमाडौं, २० फागुन । दुई वर्षे कार्यकाल भएका राष्ट्रियसभाका सांसदहरुलाई आज संसदबाट बिदा गरिँदैछ ।

दिउसो दुई बजे राष्ट्रियसभामा मन्तव्य राखेर बिदा लिने कार्यक्रम तय भएको छ । आजै कार्यकाल सकिनेमा अर्थमन्त्री डा. युवराज खतिवडासहित राष्ट्रिय सभाका १९ सांसदको कार्यकाल आज सकिँदैछ । खतिवडा आजबाट सांसद नभइ मन्त्री मात्रै रहनुहुनेछ । सांसद नहुँदा पनि ६ महिनासम्म मन्त्री हुन पाउने व्यवस्था छ । खतिवडा राष्ट्रपतिले मनोनित गर्ने सिटमा सांसद हुनुभएको थियो । पदावधि सकिनु ३५ दिनअघि नै निर्वाचन गराइसक्नु पर्ने नियमअनुसार उहारुको ठाउँमा नयाँ सांसद निर्वाचित भइसक्नु भएको छ । । आज बिदा हुने सांसदहरुको सामूहिक तस्बिर खिच्ने कार्यक्रम रहेको संसद सचिवालयले जनाएको छ । नयाँ निर्वाचित सांसदहरुको भने भोलि ११ बजे सपथग्रहण हुने भएको छ । ५९ जना सांसद रहेको राष्ट्रियसभामा प्रतिपक्षको उपस्थिति कमजोर हुने भएको छ ।

राष्ट्रियसभाको निर्वाचनमा कांग्रेसले ७ सिट गुमाएको छ । यसअघिका १३ मध्ये ६ जनामात्रै सभामा रहने छन् । यसैगरी राजपाका २ र समाजवादीको एक जना सांसद गरी ९ जना प्रतिपक्षमा रहने छन्। सत्तापक्षले भने सिट संख्या बढाएर ४७ जना र्पुयाएको छ ।