काठमाडौं, १६ माघ । शहीद प्रतिष्ठान पाँचथरले जिल्लाका शहीद परिवारलाई सम्मान गरेको छ । प्रतिष्ठानले जिल्लाका स्थानीय तह स्तरमा सम्मान कार्यक्रमको आयोजना गर्दै शहीद परिवारलाई सम्मान गरेको हो । प्रतिष्ठानले सशस्त्र द्वन्द्व, जनआन्दोलन तथा विभिन्न आदोलनहरुमा ज्यान गुमाउनेका परिवारलाई सम्मान गरेको हो । फिदिम नगरपालिकासहित सात वटा गाउँपालिकामा विभिन्न आन्दोलनमा ज्यान गुमाएका १४१ जना शहीदका परिवारलाई सम्मान गरिएको शहीद प्रतिष्ठान पाँचथरका अध्यक्ष विशाल रसाइलीले बताउनुभयो ।
शहीदहरुको आधिकारिक विवरण नभएका कारण परिवर्तनको आन्दोलनमा ज्यान गुमाउने सबैका परिवारलाई शहीद स्वरुप सम्मान गरिएको रसाइलीले बताउनुभयो । जिल्लामा सशस्त्र द्वन्द्वमा तत्कालीन विद्रोही माओवादीका कार्यकर्ता तथा समर्थक मात्रै १५८ जनाको ज्यान गएको थियो । यद्यपी उनीहरुमध्ये १४० जनाको मात्रै आधिकारिक विवरण प्राप्त भएको प्रतिष्ठानले जनाएको छ । माओवादीतर्फ सशस्त्र द्वन्द्वमा यहाँको फालेलुङ गाउँपालिकाबाट सबैभन्दा बढी ५६ जनाको ज्यान गएको थियो । प्रतिष्ठानले आगामी दिनमा प्रजातन्त्र प्राप्तिको आन्दोलनदेखि हालसम्मका सबै आन्दोलनमा ज्यान गुमाउनेका परिवारलाई शहीद परिवारको रुपमा पहिचान गरी सम्मान गर्ने तथा ब्यवस्थित अभिलेख तयार पार्ने जनाएको छ ।
प्रतिष्ठानले सम्मान गरेपछि यहाँका स्थानीय तह जनप्रतिनिधिले समेत शहीद परिवारलाई सम्मान गर्ने तथा उहाँहरुका लागि विशेष कार्यक्रम तय गर्ने बताएका छन् । जिल्लाको हिलिहाङ गाउँपालिकाका अध्यक्ष भुवानप्रसाद लिङ्देनले भन्नुभयो “हामी हाम्रै स्थानीय तहमा रहनुभएका शहीद परिवारबारे बेखवर थियौँ । उहाँहरुको पहिचान एवं सम्मानका लागि शहीद प्रतिष्ठानले ठूलो पाठ सिकाएको छ ।” लिङ्देनले आगामी दिनमा आफ्नो गाउँपालिकामा रहेका शहीद परिवारलाई विशेष सम्मान गरिने बताउनुभयो । याङवरक गाउँपालिकाका अध्यक्ष लेखनाथ घिमिरेले शहीद परिवारको सम्मानका लागि विशेष कार्यक्रम नै अघि बढाउने उल्लेख गर्नुभयो ।
शहीद दिवसको अवसरमा प्रतिष्ठानको आयोजना तथा जिल्ला समन्वय समिति पाँचथरको समन्वयमा आज फिदिममा शहीद दिवस समेत मनाइएको छ । कार्यक्रममा विभिन्न आन्दोलनमा ज्यान गुमाउने शहीदहरुको तस्वीरमा माल्र्यापण गर्दै श्रद्धाञ्जली अपर्ण गरिएको थियो । जिल्ला समन्वय समितिका प्रमुख विष्णुप्रसाद सापकोटाले सबै आन्दोलनमा ज्यान गुमाउने योद्धाहरुको स्मरण र उनीहरुका परिवारलाई सम्मान गर्नुपर्ने बताउनुभयो । उहाँले शहीद परिवारको भरणपोषणमा सहयोग पुग्ने कार्यक्रम सञ्चालन गर्न जिल्ला स्थानीय तहलाई आग्रह समेत गर्नुभयो ।
प्रतिक्रिया दिनुहोस्