बुटवल, १४ माघ । अघिल्लो वर्षहरुमा जस्तै यस वर्ष पनि एविसि न्यूजका प्रदेश पाँचका ब्यूरो प्रमुख शरण कर्माचार्यले आफ्नो पितृ श्राद्ध दिनदुखीलाई सहयोग गरेर सम्पन्न गरेकाछन् ।

आफ्नो पिताको मृत्युको तिथीको दिन पारेर कर्माचार्यले बुटवल सुख्खानगर स्थित मानव सेवा आश्रममा आश्रीत बृद्दबृद्दा तथा असहायहरुलाई खाजा खुवाउंदै पितृश्राद्ध गर्नुभएको छ । सेवा आश्रममा आश्रीत १ सय ३० जनालाई खाजा बितरण गरि कर्माचार्यले पितृकर्म गरेको मानव सेवा आश्रमकी कार्यालय प्रमुख सरु अधिकारीले बताउनुभयो । आर्थिक सम्पन्न ब्राम्हणलाई दक्षिणा दिनु भन्दा दिननुखीलाई सेवा गर्दा वास्तबिक पितृ सेवा हुने कर्माचार्यले बताउनुभयो । उहाले सडकमा मान्छे भोकै डुलिरहेको अवस्थामा अन्नलाई पिण्ड बनाएर खोलामा बगाउनुको सट्टा कुनै एक जना भोकालाई खुवाउंदा पूण्य प्राप्त हुने समेत बताउनुभयो ।

पत्रकार कर्माचार्यले हरेक वर्ष आफ्नो आमा र बाबा दुबैको मृत्यु तिथी पारेर असहायलाई सहयोग गर्दै आउनुभएको छ । बुटवलमा संचालनमा रहेको मानव सेवा आश्रममा १ सय ३० जना बृद्दबृद्दा र असहायहरुले आश्रय लिईरहेकाछन् । सेवा आश्रमको आफ्नै भवन निर्माण गर्ने उद्देश्यले बुटवलमा अर्को साताबाट महायज्ञ लगाउने तयारी भएको समेत सेविका अधिकारीले बताउनुभयो ।