३ मंसिर, काठमाडौं ।  प्रचण्डपुत्र प्रकाश दाहालको उपचारको क्रममा नर्भिक अस्पतालमा निधन भएको छ । पारिवारिक स्रोतका अनुसार आइतबार बिहान नर्भिक अस्पतालमा उहाँको निधन भएको हो । दाहालको निधन भएको औपचारिक घोषणा गरिएको छैन । केहीबेरमा अस्पतालले पत्रकार सम्मेलन गर्दैछ । दाहाललाई आइतबार बिहान पाँच बजेतिर अचेत अवस्थामा अस्पताल ल्याइएको थियो ।
अस्पतालमा अहिले आफन्त, शुभचिन्तक, नेता, कार्यकर्ता तथा सर्वसाधारणको भिड लागेको छ । झापामा रहेका माओवादी अध्यक्ष प्रचण्ड काठमाडौं फर्कनुभएको छ । छोराको मृत्युको खबरले आमा सीता दाहाल अचेत अवस्थामा हुनुहन्छ । प्रकाशको जन्म २०३८ असार १७ गते चितवनमा भएको हो । प्रकाश पुष्पकमल दाहाल प्रचण्ड र सीता दाहालका एकमात्र छोरा हुनुहुन्थ्यो । प्रकाश बुवाआमासँगै माओवादी सशस्त्र संघर्षका बेला भूमिगत हुनुभएको थियो । जनयुद्धको बेलामा बुवा प्रचण्डलाई दिएको साथ प्रकाशले अहिले पनि कायमै राख्नुभएको थियो । प्रचण्डका स्वकीय सचिवको रुपमा उहाँले काम गरिरहनुभएको थियो । सामाजिक सञ्जालमार्फत सूचना प्रवाहमा पनि प्रकाशलाई अब्बल मानिन्थ्यो । दाहालले समाजसेवीलाई दिइने प्रवल जनसेवाश्री पदक पाउनुभएको छ ।