काठमाडौं, १७  कात्तिक। संसद् सचिवालयकी महिलामाथि यौन दुर्व्यवहार गरेको अभियोग लागेका निवर्तमान सभामुख कृष्णबहादुर महराविरुद्ध आजआइतबार थुनछेक बहस हुँदै छ । बहसमा नेपाल सरकार पक्षबाट सरकारी वकिल र प्रतिवादीका तर्फबाट महराका कानुन व्यवसायीले आ–आफ्नो पक्षमा बहस गर्नेछन् ।

त्यही बहस, प्रमाणलगायतका आधारमा इजलासले थुनछेकको फैसला लिनेछ । आज महरालाई पूर्पक्षका लागि थुनामा राख्ने वा तारेखमा रिहा गर्ने भन्ने सम्बन्धी बहस हुनेछ । इजलासले पुर्पक्षमा राख्ने निर्णय लिए महराले कैद भुक्तान गर्नुपर्दछ भने धरौटी खोले वा साधारण तारेखमा छोडे रिहा हुनेछन् ।

महराविरुद्ध अभियोजनकर्ता जिल्ला सरकारी वकिलको कार्यालय काठमाडौंले बिहीबार काठमाडौं जिल्ला अदालतमा जबरजस्ती करणी उद्योगको अभियोगपत्र दर्ता गरेसँगै यस विषयले अदालतमा प्रवेश पाइसकेको छ । महराविरुद्ध पाँच वर्ष र विशिष्ट व्यक्ति भएकाले थप दुई वर्ष गरी सात वर्ष कैद सजाय माग गरिएको छ ।