काठमाडौं, ११ कात्तिक । अजरबैजानको बाकुमा आयोजित असंलग्न आन्दोलन (नाम) राष्ट्रहरुको १८ औं शिखर सम्मेलन सकेर प्रधानमन्त्री केपी शर्मा ओलीको टोली आईतबार स्वदेश फर्केको छ । सम्मेलनमा विश्व शान्ति, समृद्धि, सहअस्तित्व र पारस्पारिक सम्मानका विषयमा घोषणा पत्र जारी भएको छ ।
अजरबैजानको बाकुमा आयोजित असंलग्न आन्दोलन ‘नाम’ राष्ट्रहरुको १८ औं शिखर सम्मेलन सम्पन्न भएको छ ।सम्मेलनमा नेपालको तर्फबाट प्रधानमन्त्री केपी शर्मा ओलीको प्रतिनिधिमण्डलमा परराष्ट्रमन्त्री प्रदीपकुमार ज्ञवाली, प्रधानमन्त्रीका प्रमुख सल्लाहकार विष्णु रिमाल, परराष्ट्र मामिला सल्लाहकार डाक्टर राजन भट्टराई, परराष्ट्र सचिव शंकरदास बैरागी, संयुक्त राष्ट्र संघका लागि नेपालका स्थायी प्रतिनिधि अमृत राई र परराष्ट्र मन्त्रालयका वरिष्ठ अधिकारीहरु २१ सदस्यी टोली रहेको थियो । सम्मेलनमा प्रधानमन्त्री ओलीले असंलग्न आन्दोलन ‘नाम’ राष्ट्रहरु शान्ति, सुरक्षा, न्याय र विकासको पयार्य रहेको बताउँदै सामूहिक शक्ति र क्षमताको लाभ लिन सक्नुपर्नेमा जोड दिए । विश्वव्यापी रुपमा उठीरहेको समस्या र मुद्दाहरुलाई बहस र छलफलको माध्यमबाट समाधानको बाटो निकाल्दै असंलग्न राष्ट्रहरुको विकासका लागि आपसी हित र पारस्परिक आत्मसम्मानको वातावरण निर्माण हुनुपर्नेमा प्रधानमन्त्री ओलीले जोड दिए ।
नेपालको वर्तमान परिस्थितीको चर्चा गर्दै प्रधानमन्त्री ओलीले आगामी अप्रिलमा नेपाललले विश्वव्यापी रुपमा उठिरहेको जल्दोबल्दो विषयमा अन्तराष्ट्रिय बहसका लागि ‘सगरमाथा बहस’ को आयोजना गरिने पनि उद्घोष गरे । ‘सगरमाथा बहस’ अर्थात् ग्लोबल डाईलग मा प्रमुख रुपमा हिमालय, जलवायु परिवर्तन र भविष्यको मानवताको विषयमा छलफल गरिने पनि प्रधानमन्त्री ओलीले जानकारी दिए ।
नेपालले विगत देखि वर्तमानसम्म नै स्वतन्त्र राष्ट्रको नीति लिएर विदेशी राष्ट्रहरुसँग सम्बन्ध अगाडि बढाईरहेको परराष्ट्रमन्त्री प्रदीपकुमार ज्ञवालीले बताए । अन्तराष्ट्रिय मामिलाको जटिलतालाई पनि विचार गर्दै स्वतन्त्र राष्ट्रको रुपमा नेपालले परराष्ट्र नीति अबलम्बन गर्दै आएको उनले दाबी गरे ।
सम्मेलनमा विगतका सम्मेलनले गरेका निर्णय कार्यान्वयनको दिशामा भएका प्रगति एवं समीक्षा गरी बाकु घोषणापत्र जारी गरिएको छ । बाङडुङ सिद्धान्त आज पनि उत्तिकै सान्दर्भिक रहेकोले नाम सदस्यले विश्व प्रणालीमा अझ बढी भूमिका निर्वाह गर्न राष्ट्रहरुबीचको सहकार्य र एकतालाई थप बलियो बनाउन आवश्यक छ ।
प्रतिक्रिया दिनुहोस्