बुटवल, १८ चैत्र ।
संघीय सरकारका अर्थमन्त्री युवराज खतिवडाले सुनचांदी ब्यवसायीहरुलाई धातुजन्य खानी उत्खनन्मा लगानी गर्न आग्रह गर्नुभएको छ ।
सुनचांदी ब्यवसायी महासंघको छैठौ बार्षिक साधारणसभाको आज रुपन्देहीमा उदघाटन गर्दै अर्थमन्त्री खतिवडाले बिदेशी लगानीकर्ताहरु खानी उत्खनन्मा लगानीगर्न ईच्छुक देखिए पनि सरकार नेपाली ब्यवसायीहरुलाई उत्खनन्को काम दिन चाहेको स्पष्ट पार्नुभयो । उहांले नेपालमा रहेको बहुमुल्य पत्थर तथा धातुहरु प्रशोधन नगरि सस्तो मुल्यमा निर्यात भई रहेको भन्दै प्रशोधन गरेरमात्र निर्यात गर्न ब्यवसायीहरुलाई सुझाव दिनु भयो ।
अर्थमन्त्री खतिवडाले ब्यवसायीहरुबाट बिभिन्न बहानामा नेपालबाट सुन बाहिरी मुलुकमा गई रहेको बताउंदै बिदेश लैजाने सुनको अभिलेख राख्न ब्यवसायीहरुलाई आग्रह गर्नुभयो ।
कार्यक्रममा बोल्दै सुनचांदी ब्यवसायी महासंघका अध्यक्ष मोहन कुमार सुनारले बजारको मागको तुलनामा बैंकले ब्यवसायीहरुलाई अत्यन्त कम परिमाणमा सुन दिने गरेको बताउनुभयो । ब्यवसायीले प्राप्त गर्ने सुनको परिणाम नबढाए सुनचांदी ब्यवसायी समस्यामा पर्ने उहांको भनाई छ ।

महासंघबाट एबिसीकर्मी सम्मानीत :

महासंघको साधारसणसभाबाट सुनचांदी ब्यवसाय र आर्थिक बिषयमा कलम चलाएको भन्दै एबिसी कर्मि रबिन्द्र पौडेललाई सम्मान गरेको छ । एबिसी न्युजका जिल्ला ब्यूरो सम्पादक पौडेललाई अर्थमन्त्री खतिवडाले नगद र प्रमाणपत्र सहित सम्मान गर्नुभएको थियो । पौडेल सहित नागरिक दैनीकका समाचारदाता सन्तौष न्यौपानेलाई समेत महासंघले सम्मान गरेको छ ।
महासंघमा मुलुकभरका २२ हजार ब्यवसायी आवद्ध छन् भने ६१ वटा जिल्ला शाखा र ३० वटा एशोसियत सदस्य रहेका छन् । साधारणसभा २ दिन सम्म चल्ने महासंघले जनाएको छ ।