काठमाडौं,१६ फागुन । नेपाल धितोपत्र बोर्डले एनएमबि बैंकलाई ३ अर्ब रुपैयाँ बराबरको ऋणपत्र निष्काशनका लागि अनुमति दिएको छ ।

अनुमतिपछि एनएमबीले प्रति यूनिट १ हजारका दरका ३० लाख कित्ता ऋणपत्र निष्काशन गर्ने भएको हो ।

बैंकले कुल कित्तामध्ये ४० प्रतिशतले हुन आउने १२ लाख कित्ता अर्थात एक अर्ब २० करोड रुपैयाँको ऋणपत्र सर्वसाधारणका लागि जारी गर्नेछ । बाँकी रहेको १८ लाख कित्ता अर्थात एक अर्ब ८० करोड बराबरको ऋणपत्र व्यक्तिगतरुपबाट बिक्री हुने बताइएको छ ।

एनएमबी ऋणपत्रको निश्कासन तथा बिक्री प्रबन्धकमा सिद्धार्थ क्यापिटल लिमिटेड रहेको छ । दश वर्षे अवधिको ऋणपत्रमा लगानी गर्नेले वार्षिक १० प्रतिशतका दरले ब्याज पाउनेछन् ।

ब्याजको भुक्तानी अर्धवार्षिक रुपमा हुनेछ । ऋणपत्र १० वर्षपछि परिपक्व हुनेछ । पछिल्लो समय बैंकहरुमा देखिएको बैंकिङ क्षेत्रमा देखिएको तरलताको अभावलाई समाधान गर्न बैंकहरुले ऋणपत्रको निष्काशनमा जोड दिइरहेका छन् ।

निक्षेप संकलन तथा ऋण लगानीको अनुपात बढ्दै गएपछि बैंकहरुलाई पूँजी कोष अनुपात वृद्धि गर्न दबाबपछि ऋणपत्रमार्फत परिपुर्ति गर्न लागेका हुन ।