भैरहवा, २९ माघ । बैंकको चर्को व्याजदर विरुद्धमा विगतका केही दिनदेखि आन्दोलनमा रहेका यहांका उद्योगी व्यवसायीले तेस्रो चरणको आन्दोलन अन्तर्गत सोमबार विभिन्न बैंकका शाखा प्रबन्धक मार्फत बैंकका केन्द्रिय प्रमुखहरुलाई ज्ञापन पठाएका छन् ।

आन्दोलनको अगुवाई गरिरहेको संस्था उद्योग व्यापार संगठन रुपन्देहीका अध्यक्ष नारायण प्रसाद भण्डारीको नेतृत्वमा कृषि विकास बैंकको क्षेत्रीय कार्यालय भैरहवाका निर्देशक मिनराज पोख्रेललाई ज्ञापन दिएर तेस्रो चरणको आन्दोलनमा लागेको संगठनका महासचिव अनिल कुमार ज्ञवालीले जानकारी दिए ।

यस्तै भैरहवामा शाखा रहेका सनराईज बैंक,साईन रेसुङगा डेभ्लपमेण्ट बैंक लिमिटेड,लक्ष्मी बैंक,गण्डकी विकास बैंक,नेपाल कम्युनिटी बैंक लिमिटेड,नेपाल ईन्भेष्टमेन्ट एण्ड फाईनान्स कम्पनी लिमिटेड,नेपाल बैंक लिमिटेड,जनता बैंक,तिनाउ विकास बैंकका शाखा प्रबन्धक मार्फत केन्द्रमा ज्ञापन बुझाएका हुन् । उद्योगीहरुले व्याज समायोजन नगरिए चैत मसान्तसम्म व्याज किस्ता रोक्क गर्ने चेतावनी दिएका छन् ।

उद्योग व्यवापार संगठन रुपन्देहीको अगुवाई चलिरहेको आन्दोलनलाई थप सशतm बनाउने गरि अगाडि बढेको र निकास ननिस्कदा सम्म आन्दोलन नरोकिने संगठनका अध्यक्ष नारायण प्रसाद भण्डारीले जानकारी दिए ।

बैंकहरुले कर्जा दिंदाको समयमा निर्धारण गरेको व्याजलाई आधार मानेर आम्दानीको विवरण माग्ने तर विना जानकारी व्याज बढाउंदा त्यो आन्दानीले बढेको व्याजलाई थेग्न सक्छकि सक्दैन् जानकारी विनै मनोमानी गर्ने परीपाटी गलत भएको संगठनका सल्लाहकार तथा व्यवसायी फैंज अहमद खांले बताए ।

बैंकले आफ्नो फाईदाको लागि नियमको समेत हेक्का नराखेको उनको दावी छ । टोलीमा संगठनका वरिष्ठ उपाध्यक्ष गिरीसचन्द्र त्रिपाठी,उपाध्यक्ष रामचन्द्र रेग्मी लगायत पदाधिकारी सदस्यहरुको सहभागिता थियो ।

तेस्रो चरणको आन्दोलन अन्तर्गत माघको २८ गतेदेखि फागुनको तीन गते सम्म यहां रहेका सम्पुर्ण बैंक तथा वित्तीय संस्थाका शाखा प्रबन्धक मार्फत कार्यकारी प्रमुखलाई बैंक ज्याज घटाउन दवाव दिने गरी ज्ञापन बुझाउने,यस्तै फागुन ४ गतेदेखि ७ गतेसम्म सम्पुर्ण उद्योगी व्यवसायीहरुलाई आह्वान गर्ने र सबैलाई आफ्नो व्यतिmगत व्याज घटाउनका लागि अनुरोध गर्दै सम्बन्धीत बैंक तथा वित्तीय संस्थामा निवेदन दर्ता गराउंने नियर्ण यस्तै निवेदन दर्ता गरेको १५ दिनसम्म पनि व्याज घटाउने तर्फ पहल नगरिए चैंत समान्तमा व्याज तथा किस्ता तिर्न सक्दैनौ भन्ने चेतावनी दिने व्यवसायीहरुले निर्णय गरेका छन् । यस्तै फागुनको ८ गते नेपाल राष्ट्र बैंक सिद्धार्थनगरका निर्देशक सहित सबै बैंक तथा वित्तीय संस्था,अन्य विभिन्न संघसंस्थाको उपस्थितिमा छलफल गर्ने गरी गरी आन्दोलनका कार्यक्रमहरु सार्वजनिक गरेका थिए ।