काठमाण्डौं ५, असोज । जिल्ला अदालतले दुगड ग्रुपद्धारा सञ्चालित दुगड फ्रुट एण्ड वेभरेज प्रालिमा कार्यरत चार जना कर्माचारीलाई थुनामा राख्ने आदेश जारी गरेको छ । उनीहरुमाथि लागेको ठगी आरोप प्रमाणित भएपछि अदालतले सो आदेश जारी गरेको हो । बुधबार बसेको न्यायाधीश ऋषिराम निरौलाको इजालसले कम्पनीका अन्य चार जना सेयर होल्डरविरुद्ध पनि अदालतमा हाजिर हुन म्याद जारी गरेको छ ।

जिल्ला प्रशासन कार्यालय र अपराध अनुसन्धान महाशाखाको टोलीले गत भदौ १२ गते काठमाण्डौं सतुंगलस्थित रहेको कम्पनीको गोदाममा छापा मारेको थियो । सो क्रममा म्याद गुज्रेका चार सय ड्रम टाटापुरी म्याङगो पल्प फेला पारेको थियो । फ्रुटी बनाउन सोही वस्तु प्रयोग गरीने पाइएपछि उक्त गोदाममा शिल गरिएको थियो ।

अदालतका अनुसार कम्पनीका कर्मचारीहरू प्रमोद मेहता, गाब्रिएल रियाप्टन , मदनबाबु पाण्डे र शिबराज पोखरेलविरुद्ध पुर्पक्षका लागि थुनामा राख्न आदेश भएको छ ।

त्यस्तै कम्पनीका शेयर होल्डरमध्ये मालचन्द्र दुगड, सुरेन्द्रा दुगड, सरदा दुगड र विवेक दुगडविरुद्ध हाजिर हुन म्याद जारी गरिएको छ । उनीहरूलाई ३० दिनभित्र अदालतमा हाजिर हुन म्याद जारी गरिएको हो ।

गत वर्ष पनि दुगड फुड्सको गोदाममा छापा मारेर दुई लाख प्याकेट फ्रुटी नष्ट गरिएको थियो ।