काठमाण्डौं ४, असोज । नेपालमा उत्पादित राँगाको मासु घुम्दै चिन पुग्ने गरेको छ । तर घुमाउदै चिनमा मासु पुर्याउनु भने नेपाली व्यावसायीको रहर नभई बाध्यता बनेको छ । चिनको सरकारले गुणस्तर परीक्षण नगरिएको मासुलाई आयात गर्न दिदैन , सोही कारण व्यवसायीले घुमाउरो बाटो प्रयोग गरेर उत्पादित मासुलाई तेस्रो मुलुक हुदै चिन पुर्याउने गरेका छन् ।

यहाँ उत्पादित मासु भारत, भियतनाम र थाइल्यान्ड हुदै चिन पुग्ने गरेको छ । चीनमा मासुको परिकारको अत्यधिक माग छ । तर, त्यो मागलाई धान्नका लागि सीधा नभई तेस्रो मुलुकको सहारा लिइएको छ । यसै कारण सरकारी अभिलेखमा मासु चीन निर्यात भएको देखिदैन ।

नेपालमा खुलेका मासुजन्य उद्योगमा चिनिया लगानीकर्ताको लगानी छ, जसले नेपाली व्यवसायीसँग साझेदारी गरेका छन् । ती कम्पनीको मुख्य उद्देश्य आफ्नो मुलुकमा रहेको अत्यधिक माग धान्नु हो । र, सीधा निर्यात गर्न नसकिने भएकाले उनीहरुले तेस्रो मुलुकको बाटो अपनाएर चिनिया भूमिमा प्रवेश गराउँछन् ।

नेपालमा हालसम्म चिनिया लगानीमा १० वटा मासु उद्योग खुलिसकेका छन् । तर, तीमध्ये अधिकांश बन्द छन् । वीरगञ्ज र हेटौंडाका उद्योग बन्द भइसकेको व्यवसायीहरुले जानकारी दिए । विदेशमा माग भएअनुसारको उत्पादन गर्न नसक्ने र स्वदेशसी बजारमा मागै नभएका गरेका कारण उद्योगहरु बन्द गर्नुको विकल्प नरहेको व्यवसायीहरुको भनाइ छ ।

नेपालबाट उत्पादित मासु अन्य मुलुकको तुलनामा सस्तो पर्छ । नेपालले राँगा र भैंसीको मासुको उत्पादन बढाउने हो भने चीन निर्यातको सम्भावना प्रचुर रहेको व्यवसायीको भनाइ छ । उद्योग विभागका अनुसार आर्थिक वर्ष ०७३र७४ मा ३६ करोड रुपैयाँको राँगा तथा भैंसीको मासु थाइल्यान्ड, भियताम र लाओस निर्यात भएको छ ।

भारतबाट चराउँदै नेपाल भित्र्याइएका राँगा, भैंसी ती उद्योगमा र्पुयाएर काटिन्छ र मासु प्रशोधन गरिन्छ ।