नयाँ दिल्ली, ९ कात्तिक । पूर्व प्रधानमन्त्री एवं नेपाल कम्युनिष्ट पार्टी नेकपाका अध्यक्ष पुष्पकमल दाहाल प्रचण्डले नेपालको संविधान नागरिक घोषणापत्रको उत्कृष्ठ नमुना भएको बताउनुभएको छ ।

भारतको राजधानी नयां दिल्लीमा इन्डिया फाउन्डेसनद्वारा आयोजित पांचौं इन्डिया कन्क्लेभको उद्घाटन सत्रलाई सम्बोधन गर्दै अध्यक्ष प्रचण्डले जननिर्वाचित प्रतिनिधिले लेखेका कारण नेपालको संविधान नागरिक घोषणापत्र भएको बताउनुभएको हो ।

प्रचण्डले संविधानले जनताको सपनालाई संस्थागत गर्न र दशक लामो संघर्षबाट जनताले देखेको सपनालाई संस्थागत गर्ने काम गरेको दाबी गर्नुभयो । उहांले संविधानले जनताको सार्वभौमिकता र राज्यको अधिकारलाई यसले स्थापित गरेको बताउंदै अझै बांकी रहेका इच्छा आकांक्षालाई पुरा गर्न संविधान संशोधनको बाटो खुला राखेको टिप्पणी गर्नुभयो ।

उहांले भन्नुभयो, ‘यो नागरिक घोषणापत्रले संविधानमा जनताका अधिकार र इच्छा आकांक्षालाई अझ बढी संस्थागत गर्न संविधान संशोधनको प्रतिवद्धता समेत जनाएको छ । नागरिक मूल्य मान्यताको उच्च सम्मान गर्न र जनताको राष्ट्रिय एकतालाई मजबुद बनाउन नेपालको संविधानले महत्वपूर्ण भूमिका खेलेको छ ।’

अध्यक्ष प्रचण्डले संविधानलाई संस्थागत गर्न तीन तहको निर्वाचन सम्पन्न गर्दै संघीयतालाई संस्थागत गरेको बताउनुभयो । दशक लामो कष्टपूर्ण राजनीतिक संक्रमणकालको अन्त्य गर्दै विकासका लागि अत्यावश्यक शर्तका रुपमा रहेको बलियो स्थायी सरकार बनाउन सफल भएको बताउनुभयो ।

सबैप्रकारका राजनीतिक लक्ष्यहरु हासिल भैसकेको बताउंदै उहांले अब आफुहरुको गरिबी, बेरोजगारीको अन्त्य गर्दै विकास र समृद्धिको वृहत्तर लक्ष्य पुरा गर्नमा केन्द्रित भएको जिकिर गर्नुभयो । अध्यक्ष प्रचण्डले आफ्नो पार्टी नेतृत्वको वर्तमान सरकार सुखी नेपाली समृद्ध नेपालको लक्ष्य पुरा गर्न विकास र समृद्धिका निश्चित क्षेत्रलाई निदृष्ट गरेर अघि बढ्न खोजिरहेका बताउनुभयो ।

उहांले विकास र समृद्धिको नेपालको अभियानमा छिमेकी देशहरुबाट प्राप्त सहयोग र समर्थनका लागि आभार समेत ब्यक्त गर्नुभयो । शान्त र समृद्ध नेपालले नै यस क्षेत्रको शान्ति, स्थायित्व र विकासका लागि भूमिका खेल्न सक्ने बताउंदै उहांले आफुहरुको अपेक्षामा सबैको समर्थन रहने कुरामा विश्वस्त रहेको बताउनुभयो ।

अध्यक्ष प्रचण्डले नेपाल र भारत इतिहासकालदेखि नै सहअस्तित्वको सम्बन्ध रहेको समेत स्मरण गर्नुभयो । नेपाल र भारत भूगोल र इतिहासबाट, धर्म, नदी र संस्कृति र व्यापारबाट जोडिएका बताउंदै उहांले छिमेकी मात्र नभएर अति नजिकका मित्र भएको बताउनुभयो ।