काठमाडौ ,५ कात्तिक । सत्तारुढ दल नेपाल कम्युनिस्ट पार्टी नेकपाले काठमाडौं क्षेत्र नम्बर ७ बाट प्रत्यक्ष निर्वाचित सांसद रामवीर मानन्धरको राजीनामा अस्वीकृत गरेको छ ।
राजधानीको बालुवाटारस्थित प्रधानमन्त्री निवासमा हिजो बसेको नेकपा सचिवालय बैठकले सांसद मानन्धरले बुझाएको राजीनामाका विषयमा कुनै निर्णय नगर्ने निष्कर्ष निकालेको हो ।

बैठकले मानन्धरको पत्रबारे निर्णय गर्नु नपर्ने निष्कर्ष निकालेको प्रवक्ता नारायणकाजी श्रेष्ठले जानकारी दिनुभयो । नेपाल कम्युनिष्ट पार्टीको केन्द्रीय सचिवालयको बैठक आज पनि बस्ने भएको छ ।

बैठकमा पार्टी संगठनहरुको एकीकरण, केन्द्रीय आयोग र विभागहरुको गठनबारे छलफल भएको छ । यस्तै पार्टी, संसद र सरकार सञ्चालनका विषयहरु पनि बैठकको एजेण्डा बनेको छ । बैठकमा सचिवालय, स्थायी कमिटि र केन्द्रीय सदस्यको कार्यविभाजनबारे पनि छलफल भएको छ ।

एमाले र माओवादीबीच एकता भएको पा“च महिना बितिसक्दा पनि गठन हुन नसकेको पोलिटव्युरोको एजेण्डा पनि आजको बैठकमा छलफल हुनेछ । यस्तै, वरिष्ठ नेता माधव नेपालले प्रदेश नेतृत्व छनौटबारे पटकपटक सार्वजनिक र औपचारिकरुपमा व्यक्त गर्दै आएको असन्तुष्टीबारे समेत छलफल हुने अनुमान गरिएको छ ।