काठमाडौं, २१ असोज । बलात्कार लगाएत महिलामाथि हुने अन्य हिंसा बढ्दै गएपछि सुुदुरपश्चिम प्रदेशको धनगढी रंगशालामा करिव १७ सय महिलाहरुले एकैसाथ आत्मरक्षा तालिम लिइरहेका छन् । निर्मला पन्तको बलात्कार पछि हत्या गर्ने पत्ता नलाग्नु र त्यसपछि पनि बलात्कारका घटना बढ्दै गएपछि समाजमा उत्पन्न त्रासका कारण किशोरी, युवती र महिलाहरुमा आत्मरक्षा तालिम लिने अभुतपुर्व उत्साह देखिएको छ ।

आयोजकले तालिममा १ हजारलाई सहभागी गराउने लक्ष्य लिएका भए पनि आत्मरक्षा शिविरमा १७ सय महिला सहभागि भएका छन् । तालिम लिनेमा विभिन्न बिद्यालयका कक्षा ७ देखि कक्षा १२ सम्मका किशोरी, क्याम्पसका छात्राहरु, संस्थामा आबद्ध महिला लगायत रहेका छन् ।

आत्मरक्षा तालिम लिनेमा १४ देखि २० वर्ष सम्मका किशोरीको संख्या बढी रहेको छ। यस प्रदेशमा बलात्कार लगायतका महिला हिंसाको बिरुद्धमा आत्मरक्षा तालिम दिइएको छ ।

मुलुकमा दिनप्रति दिन बढ्दै गएको बलात्कार तथा महिला हिंसाको घटनालाई लक्षित गरी एक हप्ते आत्मरक्षा सम्बन्धी शिविर संचालन गरेको राष्ट्रिय गोजुरियो कराते दो संघ नेपालका महासचिव प्रकाश चन्दले बताए । निर्मलाको हत्या पछि पनि बढ्दै गएका बलात्कारका घटनाले समाजमा कति त्रास उत्पन्न उत्पन्न भएको छ भन्ने कुरा यो उत्साहपुर्ण सहभागिताले देखाएको महिला अधिकारकर्मी बिनु चौधरीले बताइन् ।

बलात्कार लगायतका महिलामाथि हुने हिंसा आत्मरक्षा गर्ने साहस र क्षमता मिलोस भनेर तालिममा सहभागी भएको महिलाहरुले बताएका छन्। उनीहरु यो तालिम सिकेपछि आफु बिरुद्ध हुने हिंसाका बिरुद्ध जुध्ने र आत्मरक्षा गर्ने क्षमता विकास हुने विश्वास लिएका छन् ।