काठमाडौं, १० असार । प्रधानमन्त्री केपी शर्मा ओलीले आफनो चीन भ्रमण सोचेभन्दा बढी उपलब्धिपूर्ण भएको बताउनुभएको छ ।

६ दिने चीन भ्रमणबाट स्वदेश फर्केपछि अन्तराष्ट्रिय विमानस्थलमा आयोजना गरिएको पत्रकार सम्मेलनमा प्रधानमन्त्री ओलीले चिनियाँ राष्ट्रपति सी जिङपिङ उपयुक्त समयमा नेपाल आउने बताउनुभयो । चिनियाँ राष्ट्रपति पिङको भिजनै नेपालमा रेल ल्याउने भएकाले फिजिविलिटी अध्ययन छिट्टै थालिने प्रधानमन्त्री ओलीले दाबी गर्नुभयो । फिजिविलिटी अध्ययन सकिएपछि लगानीको विषय टुंगो लाग्ने बताउनुभयो । ओलीले भन्नुभयो, ‘जो सँग पैसा छ, रेल निर्माणमा लगानी उसैले गर्छ ।’

यस्तै, प्रधानमन्त्री ओलीले नेपालले अन्तरराष्ट्रिय सम्बध र छिमेकीसँगको सम्बन्ध इमान्दार रहने भन्दै देशको राष्ट्रिय हितमा विपरीत भने सम्झौता नगरिएको बताउनुभयो । उहाँले अब नेपाललाई ट्रान्जिट पारवहन, यातायातको प्रयोगको लागि समस्या नभएको भन्दै प्रोटोकलको लागि आवश्यक अन्तिम तयारी जुलाईमा हुने जानकारी दिनुभयो ।

परराष्ट्रमन्त्री प्रदिप ज्ञवालीले चीन भ्रमणका क्रममा दुई देशबीच १४ बुँदे सहमति र सम्झौता उपलब्धीमुलक भएको बताउनुभयो । उहाँले केरुङ–काठमाडौं रेल्वेसम्बन्धी परियोजना, दुई परराष्ट्र मन्त्रालयबीच संयन्त्र स्थापना, कार्गो सञ्चालनमा तिब्बतको राजमार्ग प्रयोग, रसुवागढीमा पुल निर्माणमा सहयोग, उर्जा सहकार्य गर्ने विषयमा सहमति, उत्पादनमा लगानी तथा सहकार्य सम्झौता, मानव स्रोत सहकार्य, आर्थिक र प्राविधिक सहकार्य तथा सम्बन्ध मजबुद बनाउने जस्ता सम्झौता भएको बताउनुभयो ।

चीन भ्रमणका रहदा प्रधानमन्त्री ओलीले चिनिया“ राष्ट्रपति सी जिन पिङ, चिनियाँ समकक्षी लि खछ्याङ, चिनिया“ लगानीकर्ता, उद्योगी, लगायतको टोलीसंग भेटवार्ता गर्नुभएको थियो । प्रधानमन्त्री ओलीलाई अन्तराष्ट्र्रिय विमानस्थलको अतिविशिष्ट कक्षमा उपप्रधानमन्त्री तथा रक्षामन्त्री ईश्वर पोखरेल, नेकपाका वरिष्ठ नेता माधवकुमार नेपाललगायतले स्वागत गर्नुभएको थियो । प्रधानमन्त्री ओली असार ५ गते चीन जानुभएको थियो ।