काठमाडौं । करका दर निर्धारणमा चलखेल भएको भन्दै विपक्षी दलहरूले आरोप लगाइरहेका बेला अर्थमन्त्री स्वर्णिम वाग्लेले आरोप प्रमाणित गर्न कडा चुनौती दिएका छन्। उनले आफूविरुद्ध दुई रुपैयाँ बराबरको पनि अनियमितता प्रमाणित भए अर्थमन्त्री मात्र नभई सार्वजनिक जीवन नै त्याग्न तयार रहेको घोषणा गरेका छन्।

संसदको सार्वजनिक लेखा समितिको बैठकमा बोल्दै अर्थमन्त्री वाग्लेले कर वृद्धि सम्बन्धी सूचना चुहाएर कसैलाई अनुचित लाभ दिलाइएको वा राजस्वमा क्षति पुर्‍याइएको भन्ने आरोप निराधार रहेको दाबी गरे। त्यस्ता आरोपहरू पुष्टि हुने कुनै कागजी प्रमाण, पत्राचार वा अन्य आधार भए सार्वजनिक गर्न उनले विपक्षी सांसदहरूलाई आग्रह गरे।

समिति बैठकमा केही सांसदहरूले करका दर हेरफेरका कारण राज्यलाई दुई अर्ब रुपैयाँ बराबरको क्षति पुगेको दाबी गरेका थिए। त्यसप्रति प्रतिक्रिया दिँदै वाग्लेले दुई अर्ब मात्र नभई दुई रुपैयाँ बराबरको पनि बदमासी गरेको प्रमाणित भए आफू सबै जिम्मेवारीबाट अलग हुन तयार रहेको बताए।

“कर बढ्दै छ भनेर सूचना दिएको छ भन्ने कुरा पूर्णतः निराधार हो। कसैले हतारमा गाडी पास गरेर राज्यलाई करोडौँ रुपैयाँ घाटा पुर्‍याएको छ भने त्यसको प्रमाण लिएर आउनुस्। म कठघरामा उभिन तयार छु,” उनले भने।

अर्थमन्त्री वाग्लेले सार्वजनिक जीवनमा रहेका सबै व्यक्तिहरूले समान स्तरको नैतिकता, पारदर्शिता र जवाफदेहिता कायम गर्नुपर्नेमा जोड दिए। उनले बजेट तथा कर नीतिसम्बन्धी निर्णयहरू आर्थिक सिद्धान्त, प्रगतिशील कर प्रणाली र दीर्घकालीन आर्थिक हितलाई ध्यानमा राखेर गरिएको स्पष्ट पारे।

करका दर परिवर्तन र त्यससँग जोडिएका आरोप–प्रत्यारोपबीच अर्थमन्त्रीको यो चुनौतीले राजनीतिक वृत्तमा नयाँ बहस सिर्जना गरेको छ। अब विपक्षी दलहरूले आरोपलाई प्रमाणसहित पुष्टि गर्न सक्छन् वा सक्दैनन् भन्ने विषय चासोका रूपमा हेरिएको छ।