काठमाडौं ११ जेष्ठ । नेपाली कांग्रेसभित्र आन्तरिक विवाद चुलिँदै गएको अवस्थामा नेता डा. शेखर कोइराला ले पार्टीमा एकता कायम गर्न ५ बुँदे प्रस्ताव अघि सारेका छन्।

पुस अन्तिम साता भएको विशेष महाधिवेशनपछि कांग्रेसभित्र देखिएको असन्तुष्टि र गुटगत विवादबीच कोइरालाले सभापति तथा पदाधिकारीहरूसँग भएको छलफलमा यी प्रस्ताव प्रस्तुत गरेको उनको सचिवालयले जनाएको छ।

कोइरालासँग सभापति गगन थापा, महामन्त्री प्रदीप पौडेल लगायत नेताहरूले विभिन्न चरणमा भेटवार्ता गरेका थिए। ती भेट र अनौपचारिक छलफलपछि कोइरालाले पार्टी एकता र संगठन सुदृढीकरणलाई केन्द्रमा राख्दै प्रस्ताव अघि सारेका हुन्।

उनले आफूलाई वरिष्ठ नेता पदभन्दा पनि पार्टीभित्र एकता र सहकार्य आवश्यक रहेको स्पष्ट पारेका छन्।

शेखर कोइरालाका ५ प्रस्ताव:

१) १५औँ महाधिवेशनका लागि क्रियाशील सदस्यता अद्यावधिक अनिवार्य नगर्ने
२) १४औँ महाधिवेशनपछि नवीकरण भएका क्रियाशील सदस्यताकै आधारमा १५औँ महाधिवेशन गर्ने
३) १४औँ र विशेष महाधिवेशनपछि बनेका केन्द्रीय कार्यसमितिलाई समायोजन गरी एकीकृत गर्ने
४) कार्यसम्पादन समिति सभापतिको बहुमत रहने गरी गठन गर्ने
५) सबै निर्वाचन, छानबिन, अनुशासन र विधान समितिहरू सहमतिका आधारमा बनाउने

कांग्रेसभित्र नेतृत्व र संगठन संरचनाबारे चलिरहेको बहसका बीच यी प्रस्तावलाई महत्वपूर्ण मानिएको छ।