काठमाडौँ । नेकपा (एमाले) को सचिवालय बैठक आज अत्यन्त तनावपूर्ण बनेको छ । पार्टीका चार जना उपाध्यक्षले अध्यक्ष केपी शर्मा ओलीको राजीनामा माग गर्दै नेतृत्व हस्तान्तरणको माग राखेपछि बैठकमा चर्काचर्की भएको हो ।

बैठकमा उपस्थित स्रोतका अनुसार, पाँच जना उपाध्यक्षमध्ये रामबहादुर थापा ‘बादल’ बाहेक चार उपाध्यक्षले पार्टीको वर्तमान अवस्था कमजोर भएको भन्दै ओलीले मार्गप्रशस्त गर्नुपर्ने बताएका थिए । उपाध्यक्ष विष्णु पौडेल, पृथ्वीसुब्बा गुरुङ, गोकर्ण विष्ट र रघुजी पन्तले संयुक्त रूपमा यो माग अघि सारेको बताइएको छ ।

उपाध्यक्षहरूको माग

उपाध्यक्षहरूले बैठकमा पार्टीको संगठनात्मक अवस्था, निर्वाचन परिणाम र जनवादी केन्द्रीयताको सिद्धान्तलाई कमजोर बनाएको आरोप लगाए । उनीहरूको भनाइ थियो– “पार्टी अहिले अत्यन्त कमजोर अवस्थामा छ । यसको जिम्मेवारी अध्यक्षले लिनुपर्छ र नयाँ नेतृत्वलाई अवसर दिनुपर्छ ।”

उनीहरूले पार्टीको पुनर्गठन, युवा पुस्तालाई नेतृत्वमा ल्याउने र आन्तरिक लोकतन्त्रको अभ्यास गर्नुपर्नेमा जोड दिएका थिए ।

बादलको बचाउ, ओलीको कडा प्रतिक्रिया

यसको विपरीत, उपाध्यक्ष रामबहादुर थापा बादलले ओलीको बचाउ गर्दै उनीमाथि व्यक्तिगत हमला नगर्न आग्रह गरे । बादलले पार्टीको स्थिरता र एकताका लागि ओलीको नेतृत्व अझै आवश्यक रहेको तर्क अघि सारे ।

अध्यक्ष ओलीले भने राजीनामा दिन अस्वीकार गर्दै कडा अडान लिएका छन् । स्रोतका अनुसार, ओलीले उपाध्यक्षहरूलाई “विरोधी शक्तिसँग मिलेर पार्टी भाँड्न खोजेको” आरोप लगाए । उनले बैठकमा भन्नुभयो, “यो पार्टीको नेतृत्व मैले धेरै कठिन समयमा सम्हालेको छु । अहिले राजीनामा दिएर भाग्न तयार छैन । यदि कसैलाई समस्या छ भने पार्टीको विधानअनुसार अगाडि बढौं ।”

बैठकमा स्वर चर्काउँदै तर्क वितर्क भएपछि अध्यक्ष ओलीले आजका लागि बैठक स्थगित गर्ने निर्णय गरेका छन् । आगामी बैठक कहिले बस्ने भन्ने टुंगो लागिसकेको छैन ।

एमालेमा केही समययता आन्तरिक असन्तुष्टि बढ्दै गएको थियो । स्थानीय तह निर्वाचन र प्रतिनिधिसभा निर्वाचनमा अपेक्षित नतिजा नआएपछि पार्टीभित्र ओलीविरुद्ध असन्तुष्टि बढेको देखिन्छ । विशेष गरी युवा तथा मध्यम पुस्ताका नेताहरूले पार्टीको नेतृत्वमा पुस्तान्तरण हुनुपर्ने माग गर्दै आएका छन् ।

चार उपाध्यक्षहरूको सामूहिक मागलाई पार्टीका केही केन्द्रीय सदस्यहरूले समेत समर्थन गरेको बुझिएको छ । तर ओली निकट मानिने केही नेताहरूले भने यसलाई “अनुशासनहीन कार्य” भनेर आलोचना गरेका छन् ।

के होला अब ?

राजनीतिक विश्लेषकहरूका अनुसार, यो घटनाले एमालेमा ठूलो फुट वा गुटबन्दी निम्त्याउन सक्ने खतरा छ । यदि उपाध्यक्षहरूले आफ्नो मागमा अडान कायम राखे भने पार्टीको आगामी महाधिवेशनलाई लक्षित गर्दै ठूलो आन्तरिक द्वन्द्व सुरु हुन सक्छ ।

अध्यक्ष ओलीले भने पार्टीको एकता र अनुशासन कायम राख्न कडा कदम चाल्न सक्ने संकेत पनि गरेका छन् ।