१ जेठ, २०८३ । बेइजिङ । अमेरिकी राष्ट्रपति डोनाल्ड ट्रम्पले चिनियाँ राष्ट्रपति सी चिनफिङलाई बारम्बार “महान् नेता” भनेका छन् । चीनको तीन दिने राजकीय भ्रमणका क्रममा ट्रम्प र सीबीच बेइजिङको ग्रेट हल अफ द पिपलमा औपचारिक भेटवार्ता भएको छ ।

ट्रम्पको प्रशंसा र सकारात्मक टिप्पणी : सिन्ह्वाका अनुसार ट्रम्पले भेटवार्ताका क्रममा पटक-पटक सी चिनफिङलाई महान् नेता भनेका थिए । उनले आफूसँग गएको उच्चस्तरीय अमेरिकी व्यवसायिक प्रतिनिधिमण्डललाई चीन र यसका नेताप्रति सम्मानको संकेत बताए । “उनीहरू व्यापार र व्यवसाय गर्न उत्सुक छन्,” ट्रम्पको भनाइ उद्धृत गर्दैसिन्ह्वा ले लेखेको छ ।

ट्रम्पले यो भेटवार्तालाई “सायद अहिलेसम्मकै ठूलो समिट” भनेका छन् । उनले भने, “तपाईंको मित्र बन्नु मेरो लागि सम्मानको कुरा हो । चीन र अमेरिकाबीचको सम्बन्ध अब पहिलेभन्दा धेरै राम्रो हुने छ ।”

टेम्पल अफ हेभन भ्रमण : भेटवार्तापछि दुवै राष्ट्र प्रमुखले बेइजिङको प्रसिद्ध टेम्पल अफ हेभन (स्वर्ग मन्दिर) को भ्रमण गरेका थिए । राष्ट्रपति सीले प्रेयर फर गुड हार्भेस्ट हल बाहिर ट्रम्पलाई स्वागत गरेका थिए र दुवैले त्यहाँ संयुक्त तस्बिर खिचाएका थिए ।

चीन-अमेरिका सम्बन्धको भविष्य उज्ज्वल : ग्लोबल टाइम्स

ग्लोबल टाइम्सको सम्पादकीयले यो भेटवार्तालाई ऐतिहासिक महत्वको बताएको छ । यो भ्रमण गत अक्टोबरमा बुसानमा भएको भेटपछि दुई नेताबीचको पहिलो चीन भ्रमण हो । यसलाई अमेरिकी राष्ट्रपतिको नौ वर्षपछि चीन भ्रमण पनि भनिएको छ ।

सम्पादकीय अनुसार दुई देशले विश्वको कुल आर्थिक उत्पादनको एक तिहाईभन्दा बढी हिस्सा ओगटेका छन् । दुवै स्थायी सुरक्षा परिषद् सदस्य र विश्वका ठूला अर्थतन्त्र भएकाले चीन-अमेरिका सम्बन्ध स्थिर रहँदा अन्तर्राष्ट्रिय जगतलाई ठूलो राहत मिल्ने उल्लेख छ ।

ट्रम्प र सीबीचको नेतृत्व कूटनीतिले सम्बन्धलाई “रणनीतिक, रचनात्मक र स्थिर” बनाउने दिशामा लगिरहेको ग्लोबल टाइम्सको दाबी छ । “दुई देशबीच ठूलो पर्याप्त ठाउँ छ र एकको सफलता अर्काको लागि अवसर हो,” भन्ने सीको भनाइलाई जोड दिइएको छ ।

ट्रम्पको भ्रमणलाई दुवै देशबीचको व्यापार, आर्थिक सहयोग र विश्व शान्तिका लागि महत्वपूर्ण अवसर मानिएको छ । दुई नेताबीचको सहमति पूर्ण रूपमा कार्यान्वयन भए चीन-अमेरिका सम्बन्धले नयाँ उचाइ लिने अपेक्षा गरिएको छ ।