पोखरा । तमु प्ये ल्हु संघ यूकेको टोली क्होलासोंथरतर्फ प्रस्थान गरेको छ । अध्यक्ष क्या. डेमबहादुर गुरुङ नेतृत्वमा आज बिहान क्होलासोथरतर्फ प्रस्थान गरेका हुन् ।

तमु (गुरुङ) समुदायको आदिम पुख्र्यौली तथा ऐतिहासिक थलो क्व्होलासोंथरको अध्ययन तथा अवलोकनका लागि नेपाल आएको टोलीको सो भ्रमण छ दिनको रहने बेलायतका वरिष्ठ फोटो पत्रकार मिलन तमुले जानकारी दिए ।

भ्रमण टोलीमा तमु प्ये ल्हु संघ युकेका पदाधिकारीहरु, खेगी गुरुहरु, मिडियाकर्मी र सहयोगीहरुसहित करिव ५३ जनाको सहभागिता छ ।

सो टोली पोखराबाट भुजुङ प्रस्थान गरेको छ भने भुजुङबाट सहयोगीहरुसहित क्होला सोँप्रे ट्होतर्फ लाग्नेछ । यसक्रममा टोलीले लमजुङ, बेशिशहर, घलेगाउँ र भुजुङमा निर्मित क्होँईवोँको अवलोकन समेत गर्नेछ । त्यसपछि होजोँ हुँदै ङ्हसिखोँमा बास बस्ने गरी टोलीले अगाडि बढ्नेछ । त्यस्तै क्रचे, सच, म्रुधिँ, नायु लैफ्रोँ र जोसोगरा हुँदै क्होला सोँप्रे ट्हो पुग्नेछ ।

क्होला सोँप्रे ट्हो पुगेर टोलीले त्यहाँ छ्योप पूजा र थासोँ पूजा गर्नेछ भने दिनभरी स्थलगत अध्ययन तथा अवलोकन गर्नेछ । त्यसपछि टोली सिक्लेस गाउँको यात्रामा निस्कनेछन् । सिक्लेस गाउँ र त्यहाँ निर्माण भएका तीनवटा क्होँईवोँहरुको अवलोकन तथा भेटघाट गरेर पुनः फ.लि.ना. क्होँईवोँ पोखरा फर्किने कार्यक्रम रहेको जनाएको छ ।

पोखरा आइपुगेपछि एक विशेष समारोहबीच भ्रमणको समापन गरिने छ । जहाँ तमु प्ये ल्हु संघ युकेले सिक्लेस, सर्दिखोला, स्याउली बजार तनहुँ, रोल्पा, बस्यानी स्याङजा, रजहर नवलपुर, लक्ष्मी बजार गोरखा, बारपक गोरखा, पेल्काचौर सिम्ले स्याङजा, बुट्टाबारी झापा, भुजुङ लमजुङ र खैरहनी चितवनमा निर्माण भएका तथा निर्माणधिन क्होँईवोहरु र पैयुँखोला तमु समाज काठमाडौंको भवन निर्माण सहयोगको लागि आर्थिक सहयोग रकम हस्तान्तरण गर्ने कार्यक्रम छ ।

त्यसैगरी कार्यक्रमलाई थप रोचक र स्मरणीय बनाउनको लागि तमु प्ये ल्हु संघ केन्द्रीय युवा समितिले साँस्कृतिक कार्यक्रम प्रस्तुत गर्नेछ भने केन्द्रीय समिति र कास्की जिल्ला समितिले व्यवस्थापन सहयोग गर्नेछ ।

तमु प्ये ल्हु संघ युकेको भ्रमण अवधारणा बमोजिम जोडिएका सबैलाई टोली प्रमुख क्या. डेमबहादुर गुरुङले आवश्यक र सक्दो सबै सहयोग गरी भ्रमण सफल बनादिन अनुरोध गरेका छन् ।

तस्विरहरुः मिलन तमु