काठमाडौं, २९ चैत्र । प्रधानमन्त्री बालेन (बालेन्द्र) शाहसँग प्रशस्त सम्पत्ति देखिएको छ । तर उनको सम्पत्तिको अधिकांश हिस्सा पैतृक रहेको प्रधानमन्त्री तथा मन्त्रिपरिषद्को कार्यालयले आइतबार सार्वजनिक गरेको प्रधानमन्त्री र मन्त्रीहरूको सम्पत्ति विवरणमा उल्लेख छ ।

विवरणअनुसार शाहले आफ्नो सम्पत्ति विवरणमा १ करोड ४६ लाख रुपैयाँ नगद रहेको खुलाएका छन् । सो रकम फेसबुक, युट्युब, टिकटक, इन्स्टाग्राम जस्ता सामाजिक सञ्जालबाट आम्दानी गरेको उनले उल्लेख गरेका छन् । यस्तै श्रीमती सविना काफ्लेसँग १९० तोला गहना भएको समेत खुलाएका छन् ।

जुन पैतृक सम्पत्ति भएको शाहले खुलाएका छन् । तर उनीसँग भएको गहना सुनचाँदी हिरा वा के हो भन्नेबारे भने स्पष्ट गरिएको छैन । यसबाहेक शाहले मधेसमा १० बिघाभन्दा बढी जग्गा रहेको उल्लेख गरेका छन् । धनुषामा १।२ बिघा र सप्तरीमा ९ बिघा पैतृक सम्पत्ति रहेको उनले खुलाएका हुन् । जुन सम्पत्ति उनको बुबा र दाइको नाममा देखिन्छ । यस्तै काठमाडौँमा दाइको नाममा ५ आना जग्गा पनि रहेको छ । यसबाहेक शाहले आफ्नो सम्पत्ति विवरणमा सामाजिक सञ्जालमा भएको फलोअर पनि उल्लेख गरेका छन् । सम्पत्ति विवरणको अन्य शीर्षकमा उनले फेसबुक, युट्युब र टिकटकको फलोअर्स समेत देखाएका हुन् ।