काठमाडौं, २५ चैत्र । कपिलवस्तुको महाराजगन्ज नगरपालिका–२ बरगदामा सुरक्षाकर्मीको गोली लागेर मृत्यु भएका २३ वर्षीय अरुण भन्ने जितेन्द्र यादवको परिवारले क्षतिपूर्ति र राहतको माग गरेका छन् ।चैत ७ गते गोली लागेका यादवको उपचारका क्रममा सोमबार मृत्यु भएको हो । दुई समुदायबीच भएको विवादका बढ्दै गएपछि प्रहरीले स्थिति नियन्त्रण लिनका लागि गोली चलाएको थियो ।सोमबार बिहान भरतपुरस्थित चितवन मेडिकल कलेजमा उपचारका क्रममा यादवको मृत्यु भएको थियो ।उनको शव सोमबार राति नै कपिलवस्तु ल्याइए पनि पीडित परिवारसँग समझदारी नभएकाले दाहसंस्कारमा ढिलाई भएको थियो । शव तौलिहवास्थित कपिलवस्तु अस्पतालमा राखिएको छ । घटनामा अन्य तीन जना घाइते भएका थिए ।मृतक अरुण यादवका हजुरबुवा नन्दलाल यादवसहितको टोलीले प्रमुख जिल्ला अधिकारी जनार्दन गौतमलाई बुधबार ६ बुँदे माग पेश गरेका थिए ।

ती माग गृह मन्त्रालयगतका निकायमा पठाउने निर्णयसँगै कपिलवस्तु अस्पतालमा रहेको मृतकको शव दाहसंस्कारका उठाउने समझदारी भएको हो । प्रमुख जिल्ला अधिकारी नवराज गौतमले मृतक परिवारका माग पूरा गरिएको जनाए ।मंगलबार जिल्ला प्रशासन कार्यालयमा मृतकका परिवार, स्थानीय सरोकारवाला र प्रशासनबीच बैठक बसेर समझदारी जुटेको हो ।

संघीय सांसद अभिषेकप्रताप साहले प्रतिनिधिसभा बैठकमा घटनाका मृतक तथा घाइते पीडित परिवारले न्याय नपाएको भन्दै उच्चस्तरीय निष्पक्ष छानबिन समिति गठन गरी दोषीमाथि कडा कारबाही गर्न माग गरेका छन् भने लुम्बिनी प्रदेशसभा सदस्य नवराज लामिछाने।सिके गुप्तालगायतले पनि घटनाको निष्पक्ष र विश्वासिलो छानबिन गरी दोषीलाई कानुनको दायरामा ल्याउन माग गरेका छन् । उनले विज्ञप्ति जारी गर्दै मृतकलाई सहिद घोषणा गरी राज्यका तर्फबाट सम्मान प्रकट गर्न र पीडित परिवारलाई न्यायोचित क्षतिपूर्ति उपलब्ध गराउन माग गरेका छन् ।

साथै उनले घाइतेहरूको निःशुल्क र प्रभावकारी उपचार सुनिश्चित गर्न आग्रह गरेका छन् । त्यस्तै राष्ट्रिय सभाका पूर्व सदस्य दृगनारायण पाण्डेले शान्तिपूर्ण आन्दोलनमा गोली चलाइएको र घाइतेको उपचार प्रभावकारी रूपमा हुन नसकेको विषयमा पारदर्शी छानबिन गरी दोषीमाथि कानुनअनुसार कडा कारबाही गर्न माग गरेका छन् । उनले मृतकका परिवारलाई रोजगारीको व्यवस्था गरी जिल्लामा शान्ति, सुरक्षा र विश्वासको वातावरण बनाउन आग्रह गरेका छन् ।