काठमाडौं — नेकपा निकट युवा संगठन जेन-जी रेड फोर्सकी संयोजक स्मृति तिमल्सिना लाई प्रहरीले पक्राउ गरेको छ ।

बिहान करिब ११ बजे अनामनगरबाट सादा पोसाकका प्रहरीले “पार्टीका मान्छे हौँ, काम छ” भन्दै उनलाई नियन्त्रणमा लिएका थिए । पक्राउ गरेलगत्तै उनलाई भद्रकालीस्थित प्रहरी परिसर लगिएको थियो ।

स्मृति तिमल्सिनाले कुरा गर्दै भनेकी छन्, “सरकारको आलोचना गरेको कारणले मलाई पक्राउ गरिएको हो ।” प्रहरीले उनलाई छाड्दा आइन्दा सरकारविरुद्ध कुनै पनि भिडियो नबनाउने लिखित कागज गराएको र “भिडियो बनाउनुअघि गृह मन्त्रालयको अनुमति लिनुपर्ने” चेतावनी दिएको उनले बताइन् ।

“प्रहरी कार्यालयमा लिखित कागज गराएर मात्र मलाई छाडिएको छ,” उनले भनेकी छन् ।

स्मृति तिमल्सिना तत्कालीन माओवादी निकट युवा कार्यकर्ता हुन् । नेकपाले गत २९ असोजमा उनलाई जेन-जी रेड फोर्स को संयोजक बनाएको थियो । उक्त संगठनले देशभर आफ्नो सञ्जाल विस्तार गर्दै जनचेतनामूलक कार्यक्रम सञ्चालन गर्दै आएको छ ।

यो घटनाले नयाँ सरकार गठन भएको छोटो समयमै अभिव्यक्ति स्वतन्त्रता र प्रेस स्वतन्त्रतामाथि प्रश्न उठाएको छ ।

सरकार पक्षबाट भने अहिलेसम्म यो घटनाबारे कुनै आधिकारिक प्रतिक्रिया आएको छैन ।