काठमाडौँ । सिंहदरबारमा निर्माणाधीन नयाँ संघीय संसद् भवनको करिब ९४ प्रतिशत काम सम्पन्न भए पनि प्रतिनिधिसभाको मुख्य हल तयार नभएकाले पहिलो बैठक वैकल्पिक ‘मल्टिपर्पोज’ हलमा बस्ने तयारी गरिएको छ।

आयोजना निर्देशक रोशन श्रेष्ठका अनुसार मुख्य हलमा फल्स सिलिङ र अडियो–भिडियो सिस्टम जडान बाँकी रहेकाले तत्काल सञ्चालन सम्भव नभएको हो। स्काफोल्डिङ हटाउने काम ढिलो हुँदा तार जडान गर्न नसकिएको उनले बताए।

संसद् सचिवालयका दुई ब्लक तयार भइसकेका छन् भने संसदीय दल र समितिका हल पनि तयारी अवस्थामा छन्। भीभीआईपी ब्लक करिब एक हप्तामा तयार हुने अनुमान गरिएको छ।

तीन वर्षमा सक्ने लक्ष्य रहेको यो परियोजना ६ वर्ष बित्दा पनि अझै ६ प्रतिशत काम बाँकी छ। सुरुमा ५ अर्ब ६७ करोड रुपैयाँ लागत रहेको आयोजना भेरिएसनपछि ६ अर्ब २९ करोड रुपैयाँ पुगेको छ।

यसबीच, नयाँ बानेश्वरस्थित अन्तर्राष्ट्रिय सम्मेलन केन्द्र, जहाँ संविधानसभा र संघीय संसद् बैठक हुँदै आएका थिए, अब इतिहास बन्ने भएको छ।