काठमाडौं । राष्ट्रिय स्वतन्त्र पार्टीले प्रतिनिधि सभा निर्वाचन २०८२ मा काठमाडौंबाट विजयी खाता खोलेको छ। पार्टीकी उम्मेदवार रञ्जु दर्शना न्यौपाने काठमाडौं निर्वाचन क्षेत्र नम्बर १ बाट १० हजार ५८१ मतसहित विजयी भएकी हुन्।

उहाँले नेपाली कांग्रेसका उम्मेदवार प्रवल थापालाई ५ हजार ८४८ मतान्तरले पराजित गर्नुभयो। यस निर्वाचन क्षेत्रमा राष्ट्रिय प्रजातन्त्र पार्टीका उम्मेदवार रवीन्द्र मिश्रले २ हजार ७४४ मत प्राप्त गर्नुभयो।

‘घण्टी’ले थप्यो अर्को सिट

यसैबीच, काठमाडौं निर्वाचन क्षेत्र नम्बर ८ मा पनि रास्वपाले विजय हासिल गरेको छ। पार्टीका उम्मेदवार विराज भक्त श्रेष्ठ विजयी भएका हुन्।

मतगणनामा उनले प्राप्त गरेको अग्रता गन्न बाँकी मतभन्दा बढी भएपछि उनको विजय सुनिश्चित भएको निर्वाचन अधिकारीहरूले बताएका छन्। औपचारिक घोषणा भने निर्वाचन आयोगले गर्न बाँकी रहेको छ।

काठमाडौंका यी दुई क्षेत्रको जितसँगै रास्वपाले संघीय संसद्मा आफ्नो सिट थप्दै राजधानीमा प्रभाव विस्तार गरेको राजनीतिक विश्लेषकहरूको टिप्पणी छ। अब अन्य निर्वाचन क्षेत्रका परिणामले रास्वपाको समग्र संसदीय शक्ति कति हुन्छ भन्ने स्पष्ट हुने छ।