काठमाडौं । रामेछाप नगरपालिका–२ सिरुबारीमा निर्वाचन सामग्री बोकेको गाडी दुर्घटना हुँदा एक जना प्रहरीको मृत्यु भएको छ भने सात जना घाइते भएका छन्।

सोमबार अपराह्न करिब ४ बजेतिर भएको दुर्घटनामा प्रहरी सहायक निरीक्षक (असई) पर्शुराम यादवको घटनास्थलमै मृत्यु भएको सशस्त्र प्रहरी बलका डिएसपी एवं सहप्रवक्ता शैलेन्द्र थापाले जानकारी दिए। गाडीमा कुल ११ जना सवार रहेका थिए। तीमध्ये तीन जना दुर्घटना हुनुअघि गाडीबाट हाम फालेका थिए।

मन्थलीबाट कालिका देवी माध्यमिक विद्यालय र देउराली माध्यमिक विद्यालयका मतदान केन्द्रमा निर्वाचन सामग्री तथा कर्मचारी लिएर जाँदै गरेको गाडी सडकबाट करिब २०० मिटर तल खसेको थियो।

दुर्घटनापछि सशस्त्र प्रहरी बल नेपाल विपद् उद्धार बेस खुर्कोटबाट सशस्त्र प्रहरी नायब निरीक्षक रमेशबहादुर थापाको कमाण्डमा गोताखोर तथा विपद् व्यवस्थापन तालिमप्राप्त टोली उद्धार कार्यमा खटिएको थियो।

उद्धारपछि घाइतेहरूलाई उपचारका लागि मन्थली अस्पताल पठाइएको छ। दुर्घटनाको कारणबारे थप अनुसन्धान भइरहेको प्रहरीले जनाएको छ।