काठमाडौँ, १५ माघ । भदौ २३ र २४ गते भएको जेनजी आन्दोलनमा भागेका एक थुनुवाले समूह बनाएरै तीन महिनादेखि काठमाडौँ राजधानीमा आतंक मच्चाएको पाइएको छ। काभ्रेको भुम्लु गाउँपालिका–३ घर भएका २३ वर्षीय विनय तामाङले समूह बनाएरै काठमाडौँ उपत्यकाका विभिन्न ठाउँमा व्यक्तिहरूमाथि र घरभित्रै पसेर गरगहनालगायत सामानहरू लुटपाट गरेर आतंक मच्चाएको पाइएको हो।

उनी भदौ २४ गते भएको जेनजी आन्दोलनका समयमा बुढानीलकण्ठस्थित प्रहरी कार्यालयको थुनुवा कक्षबाट भागेका थिए। त्यस समयमा पनि उनी चोरी आरोपमा पक्राउ परेका थिए।

जेनजी आन्दोलनमा भाग्ने अवसर पाएका विनयले पछिल्लो समय लुटपाट गर्ने समूह नै बनाएर राजधानीमै आतंक मच्चाउँदै आएका थिए। लुटपाट र कुपटपिटमा संलग्न रहेको पाइएपछि विनयसहित प्रहरीले १० जनालाई पक्राउ गरेको छ।

पक्राउ पर्नेहरूमा विनयसँगै, सिन्धुली मरिण गाउँपालिका ५ का २४ वर्षीय आयन माझी, ७ का ३२ वर्षीय सविन माझी, काभ्रेको चौरी देउरालीका १ का २९ वर्षीय पेमा तामाङ, २० वर्षीय सलोन तामाङ, भुम्लु गाउँपालिका १ का १८ वर्षीय राजिब भण्डारी रहेका छन्।
यस्तै रामेछापको दोरम्बा ८ का ३२ वर्षीय बिशाल तामाङ, खोटाङ ज्वलेर्समा काम गर्ने मोरङ पथरीका २३ वर्षीय मनिस रमाइली, खोटाङ घर भएका सुनचाँदी कालिगढ २८ वर्षीय बिदुर विश्वकर्मा र सिन्धुपाल्चोकको लिसंखुपाखर ३ का २९ वर्षीय फुर्वा तामाङ छन्।
उनीहरूले जेनजी आन्दोलनको पछिल्लो तीन महिनादेखि काठमाडौँमा रातको समयमा सडकमा हिडिरहेकाहरूमाथि लुटपाट गर्दै आइरहेका थिए। प्रहरी परिसर काठमाडौँका प्रहरी प्रमुख एसएसपी रमेश थापाका अनुसार लुटपाट गर्ने समूहमध्येका मुख्य योजनाकार विनय हुन्।
उनी प्रहरीको गोली लागेर घाइतेसमेत भएका छन्। गएराती मुलपानीमा प्रहरीको चेटपोष्टमा बाइक हुइँकाउँदै आएको समयमा चेकजाँच गर्ने क्रममा उनी प्रहरीमाथिसमेत जाइलाग्न खोजेपछि प्रहरीले गोली चलाएको थियो।उनको खुट्टामा गोली लागेको छ।थापाका अनुसार अन्य व्यक्ति पनि लुटपाट र आपराधिक पृष्ठभूमीका हुन्। यस समूहले दिउँसोमा ट्याक्सी चलाउने गरेकोसमेत पाइएको थापाले जानकारी दिए।दिउँसोमा ट्याक्सीबाट रेकी गर्ने र रातको समय भयो भने बाइकमार्फत घुमेर लुटपाट गर्ने गरेका थिए। यस समूहले बौद्ध, स्वयम्भू, बुढानीलकण्ठ, गौशाला र ठिमीलगायत क्षेत्रमा लुटपाट गरेको पाइएको छ।

प्रहरीले २ वटा ट्याक्सी र ६ वटा मोटरसाइल बरामद गरेको छ। साथै एक थान खुकुरी र मोबाइल फोनहरूसमेत बरामद गरेको प्रहरी परिसर काठमाडौँले जानकारी दिएको छ।दिउँसोभरी उनीहरू चोरी गर्ने ठाउँ, व्यक्तिहरूको रेकी गर्ने, साँझ ९ बजेतिर खान खान जम्मा हुने र त्यसपछि बिहान ४ बजेसम्म लुटपाटमा संलग्न हुने गरेका थिए।आफू लुटिएको भन्दै प्रहरी परिसर काठमाडौँमा १७ वटा उजुरी परेको छ।

जेनजी आन्दोलनपछि यसै पनि सुरक्षा चुनौति बढेको छ। काठमाडौँ उपत्यकामै लुटेराहरूको समूहले आतंक मच्चाएको विषयले नजिकिएको चुनावमा थप सुरक्षा जोखिम देखाएको छ।