हेटौंडा, १५ माघ । मकवानपुर निर्वाचन क्षेत्र नम्बर १ मा २१ फागुनको प्रतिनिधिसभा निर्वाचनका लागि २३ उम्मेदवार मैदानमा उत्रिएका छन्। जसमध्ये १३ जना दलीय र १० जना स्वतन्त्र छन्। यो क्षेत्रमा नेकपा एमाले, नेपाली कांग्रेस, राष्ट्रिय प्रजातन्त्र पार्टी (राप्रपा), नेपाली कम्युनिस्ट पार्टी (नेकपा) र राष्ट्रिय स्वतन्त्र पार्टी (रास्वपा) का उम्मेदवारबीच मुख्य प्रतिस्पर्धा हुने देखिएको छ।

एमालेबाट रामेश्वर राना, कांग्रेसबाट महालक्ष्मी उपाध्याय ‘डिना’, राप्रपाबाट दीपकबहादुर सिंह, नेकपाबाट विजय गौतम र रास्वपाबाट प्रकाश गौतम मुख्य प्रतिस्पर्धी छन्।

यहाँको रोचक पक्ष यो हो कि पटक–पटक चुनाव लडिसकेका पुराना अनुहारहरूलाई यसपालि नयाँ पुस्ताका उम्मेदवारहरूले कडा चुनौती दिइरहेका छन्। डिना र सिंह दुवैले यो पाँचौँ पटक प्रतिनिधिसभा चुनाव लड्दैछन्। डिनाले यसअघिका सबै चुनाव हारेकी छन् भने सिंहले २०७९ मा मात्र जितेका थिए।

राना, गौतम र प्रकाश गौतम भने प्रतिनिधिसभामा जनताबाट प्रत्यक्ष अनुमोदनका लागि पहिलो पटक चुनावी मैदानमा छन्। राना पाका उमेर समूहका छन् भने गौतमद्वय युवा पुस्ताका। यसरी पुरानो अनुभव र नयाँ ऊर्जाको रोचक टक्कर हुने देखिएको छ।

मतदाता र भूगोलको चुनौती

क्षेत्रमा १ लाख ५८ हजार ४३५ मतदाता छन् (७८ हजार ८१० महिला, ७९ हजार ६२१ पुरुष)। २०७४ मा यो संख्या १ लाख २४ हजार ७९९ थियो।

क्षेत्रमा हेटौंडा उपमहानगरपालिकाको १५ वटा वडा, मकवानपुरगढी गाउँपालिकाको ४ वटा वडा, बागमती र बकैया गाउँपालिका पर्छन्। हेटौंडा उपमहानगरका मतदाता शिक्षित र शहरी छन्, जहाँ मत परिवर्तनको सम्भावना उच्च छ। ग्रामीण भेगमा भने संगठित भोट बढी प्रभावशाली हुन्छ।

२०७९ मा सिंहले हेटौंडा उपमहानगरको मतले जितेका थिए। डिनाले बागमती, बकैया र मकवानपुरगढीको भोट धेरै ल्याएकी थिइन्, तर सिंहले २ हजार ३८२ मतान्तरले जितेका थिए (सिंह २७ हजार ८१६, डिना २५ हजार ४३४)।

दलहरूको आकलन

• एमाले : उपाध्यक्ष हिदम लामा भन्छन्, “रानाको अनुभव, पार्टीको मजबुत संगठन र उच्च राजनीतिक छविका कारण जित सुनिश्चित छ।”
• कांग्रेस : सचिव भीमसेन महत भन्छन्, “अघिल्लो निर्वाचनभन्दा यसपालि हाम्रो मत बढ्छ। ग्रामीण क्षेत्रमा कमजोर देखिए पनि हेटौंडामा सुधार हुन्छ। पार्टी एकढिक्का छ।”
• नेकपा : नेता प्रल्हाद लामिछाने भन्छन्, “युवा उम्मेदवार विजय गौतमले बागमती र बकैयामा बलियो आधार छ। हेटौंडा कमजोर भए पनि अध्ययनशील र सुशासनको अनुभवले जित सम्भव छ।”
• राप्रपा : सहकोषाध्यक्ष सन्दीप सापकोटा भन्छन्, “सिंहले नियमित जनसम्पर्क गरेका छन्। विकासका योजना र मतदातासँगको सम्बन्धले दोस्रो पटक पनि जित्छन्।”

यो क्षेत्रमा पुराना उम्मेदवारहरूको अनुभव र नयाँ पुस्ताको ऊर्जाबीचको प्रतिस्पर्धा रोचक बन्ने देखिएको छ। मतदाताले कसलाई रोज्छन् भन्ने फागुन २१ मा मात्र थाहा हुन्छ।