काठमाडौं ५ माघ, : आज तामाङ समुदायले नयाँ वर्षका रूपमा मनाउने २८६२ औँ सोनाम ल्होसार पर्व हर्षोल्लासका साथ मनाइँदैछ। प्रत्येक वर्ष माघ शुक्ल प्रतिपदाका दिन मनाइने यो पर्व तामाङ समुदायको प्रमुख सांस्कृतिक चाड हो।

सोनाम ल्होसारलाई मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर र सुँगुर गरी १२ वर्षचक्रमा विभाजन गरिएको छ। आजबाट सर्प वर्ष समाप्त भई घोडा वर्ष सुरु भएको छ।

ल्होसारका १२ वटै वर्ष पशुपन्छीका नामबाट गणना गरिने भएकाले यसलाई प्रकृतिपूजासँग जोडिएको पर्वका रूपमा लिइने अनुसन्धानकर्ताहरू बताउँछन्।

तामाङ जातिको बाहुल्यता रहेको वाग्मती प्रदेशका विभिन्न जिल्लामा यो पर्व विशेष उल्लासका साथ मनाइन्छ। पर्वका अवसरमा बौद्धनाथ क्षेत्र विकास समितिले बौद्ध क्षेत्रमा विविध सांस्कृतिक कार्यक्रम आयोजना गरेको छ।

यसैगरी नेपाल तामाङ घेदुङले राजधानीको टुँडिखेलमा शनिबारदेखि तीन दिनसम्म चल्ने ल्होसार महोत्सव सुरु गरेको छ। आइतबारदेखि टुँडिखेलमा औपचारिक रूपमा ल्होसार महोत्सव सञ्चालन भइरहेको छ।

विगतमा सोनाम ल्होसारको सार्वजनिक बिदा कटौती गरिएको भए पनि पछि सरकारले देशैभर सार्वजनिक बिदा दिन थालेको छ। विभिन्न प्रदेश तथा स्थानीय सरकारले पनि आज सार्वजनिक बिदा दिएका छन्।

पर्वका अवसरमा राष्ट्रपति, प्रधानमन्त्री तथा विभिन्न राजनीतिक दलका नेताहरूले शुभकामना सन्देश व्यक्त गरेका छन्।

महोत्सवअन्तर्गत तामाङ समुदायका ताम्बा, बोन्बो र लामाहरूको विशेष सांस्कृतिक झाँकी, परम्परागत गीत–नृत्य प्रस्तुत गरिनेछ। साथै राष्ट्रिय तथा अन्तर्राष्ट्रिय रूपमा ख्याती प्राप्त कलाकारहरूको प्रस्तुति समेत रहने मूल समारोह समितिले जनाएको छ।