काठमाडौं ४ माघ । नेपाली कम्युनिस्ट पार्टी (नेकपा) ले लुम्बिनी प्रदेशका अधिकांश निर्वाचन क्षेत्रमा उम्मेदवार टुंगो लगाएको छ । तर प्रदेश राजधानी दाङका दुई निर्वाचन क्षेत्रसहित केही स्थानमा भने साविक माओवादी केन्द्र र साविक एकीकृत समाजवादीबीच सहमति नजुट्दा उम्मेदवार चयन हुन सकेको छैन ।

पूर्वी रुकुमबाट नेकपा संयोजक प्रचण्ड स्वयं उम्मेदवार बनेका छन् । दाङ क्षेत्र नम्बर ३ मा भने तत्कालीन माओवादी लडाकुका डिभिजन कमाण्डर तथा हाल लुम्बिनी प्रदेशसभा सदस्य धनबहादुर मास्कीको नाम टुंगो लागेको छ ।

दाङ क्षेत्र नम्बर १ मा उम्मेदवार चयनलाई लिएर तीव्र विवाद देखिएको छ । अघिल्ला दुई निर्वाचनमा विजयी मेटमणि चौधरीलाई तेस्रोपटक पनि उम्मेदवार बनाउने तयारी भइरहेका बेला पूर्वमुख्यमन्त्री **कुलप्रसाद केसी (सोनाम)**ले विरोध जनाएका छन् । साविक माओवादी नेता केसीले टिकट नपाए बागी उम्मेदवारी दिने चेतावनी दिएका छन् ।

दाङ क्षेत्र नम्बर २ मा साविक माओवादी नेता निर्मल आचार्यको नाममा छलफल भए पनि औपचारिक निर्णय भइसकेको छैन । अघिल्लो निर्वाचनमा यही क्षेत्रबाट माओवादी नेतृ रेखा शर्माले एमाले महासचिव शंकर पोखरेललाई पराजित गरेकी थिइन् । यसपटक शर्मा उम्मेदवार सिफारिसमै परेकी छैनन् ।

नेकपाले लुम्बिनी प्रदेशमा हालसम्म टुंगो लगाएका उम्मेदवारको सूची यसप्रकार छः

पश्चिम नवलपरासी
– क्षेत्र १: सिन्धु जलेसा
– क्षेत्र २: देवेन्द्र पौडेल

रुपन्देही
– क्षेत्र २: विश्वदीप पाण्डे
– क्षेत्र ३: फैयाद खान
– क्षेत्र ४: बाबुलाल यादव
– क्षेत्र ५: वकिल मुसलमान

कपिलवस्तु
– क्षेत्र १: कृष्ण कँवर
– क्षेत्र २ र ३: टुंगिन बाँकी

दाङ
– क्षेत्र १: टुंगिन बाँकी (मेटमणि चौधरी वा कुलप्रसाद केसी)
– क्षेत्र २: टुंगिन बाँकी (निर्मल आचार्यको नाममा छलफल)
– क्षेत्र ३: धनबहादुर मास्की

पूर्वी रुकुम
– प्रचण्ड

रोल्पा
– वर्षमान पुन

प्युठान
– भोजविक्रम बुढा

अर्घाखाँची
– रामबहादुर चौहान

गुल्मी
– क्षेत्र १: सुदर्शन बराल
– क्षेत्र २: बुद्धिबहादुर जीसी

पाल्पा
– क्षेत्र १: होमबहादुर सुनारी
– क्षेत्र २: सोमप्रसाद पाण्डे

बाँके
– टुंगिन बाँकी

बर्दिया
– क्षेत्र १: बामदेव गौतम
– क्षेत्र २: टुंगिन बाँकी (कविराम थारु वा लालवीर चौधरी)