काठमाडौं ३० पुस । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले जेन जी आन्दोलनलाई सुनियोजित षड्यन्त्र भएको दाबी गरेका छन्। अन्तर्राष्ट्रिय समाचार नेटवर्क आरटीसँगको अन्तर्वार्तामा उनले २३ र २४ भदौको आन्दोलन अस्वभाविक र योजनाबद्ध रहेको बताएका हुन्।

‘यो कुनै सामान्य वा स्वाभाविक घटना थिएन। यो एक्कासी हुनै सक्दैन, यो पूर्ण रूपमा सुनियोजित थियो,’ ओलीले भने। उनले जेन जी पुस्तालाई अगाडि सारेर अराजक र असामाजिक तत्वले आन्दोलनमा घुसपैठ गरेको र संसद् भवनमा आक्रमण भएको दाबी गरे।

ओलीका अनुसार, श्रीलंका र बंगलादेशले आफ्नो देशमा भएका प्रदर्शनजस्तै नेपालमा पनि हुनसक्ने चेतावनी त्यसअघि नै दिएका थिए। ‘उनीहरूले यस्तो हुन सक्छ भनेर भनिरहेकै थिए, र अन्ततः भयो,’ उनले भने। उनले यसलाई नेपालको लोकतन्त्र र सार्वभौमिकतामाथिको आक्रमणको संज्ञा दिए।

केही वर्षदेखि नै यस घटनाको तयारी भइरहेको दाबी गर्दै ओलीले अवस्थाको गम्भीरता बुझ्न नसक्नु आफ्नो सरकारको कमजोरी भएको पनि स्वीकार गरे। घटनाको पूर्ण छानबिन हुन समय लाग्ने उनको भनाइ छ।

अन्तर्वार्तामा ओलीले आफ्नो कार्यकालमा चीन र भारत दुवैसँग सम्बन्ध राम्रो रहेको र नेपालको भूमि कुनै पनि देशविरुद्ध प्रयोग हुन नदिने नीति कायम रहेको स्पष्ट पारे।

उनले हाल नेपालमा निर्वाचनका लागि उपयुक्त वातावरण नबनेको पनि बताएका छन्। फेरि प्रधानमन्त्री बन्ने विषयमा भने उनले व्यक्तिगतभन्दा देशको सार्वभौमसत्ता मुख्य विषय भएको बताए।

यसैबीच, राष्ट्रिय स्वतन्त्र पार्टीमा आबद्ध भएर सक्रिय राजनीतिमा आएका बालेन शाहको निर्णयको ओलीले स्वागत गरेका छन्। युवाको राजनीतिमा सहभागिता सकारात्मक भएको उल्लेख गर्दै उनले लोकतान्त्रिक प्रक्रियालाई सम्मान गर्नुपर्ने बताए।

Gen Z protests in Nepal were a planned conspiracy – former PM Video