काठमाडौं, २१ चैत । प्रधानमन्त्री केपी शर्मा ओलीले आफ्नो भारत भ्रमणबारे पूर्व प्रधानमन्त्रीहरुसँग छलफल गर्नुभएको छ ।

प्रधानमन्त्री ओलीले वालुवाटास्थित निवासमा पूर्वप्रधानमन्त्रीहरु र कुटनीतिक मामिला जानकारहरुसँग छलफल गर्नु भएको हो ।

हिजो संघीय संसद्लाई भ्रमणबारे जानकारी गराउनुभएका ओलीले पूर्वप्रधानमन्त्रीहरुलाई समेत भ्रमण जानकारी गराउँदै राष्ट्रिय सहमति र एकताका साथ भ्रमणमा जान लागेको बताएको उहाँको सचिवालयले जनाएको छ ।

प्रधानमन्त्री निवासमा भएको छलफलमा पूर्व प्रधानमन्त्रीहरु पुष्पकमल दाहाल प्रचण्ड, शेरबहादुर देउवा, माधवकुमार नेपाल, झलनाथ खनाल र लोकेन्द्रबहादुर चन्द र मन्त्रिपरिषदका पूर्व उपाध्यक्ष खिलराज रेग्मीपनि सहभागी हुनुहुन्छ ।

यस्तै कुटनीतिक मामिला जानकारहरु नेपाल–भारत प्रबुद्ध व्यक्ति समूह (इपीजी) मा नेपाली नेतृत्वकर्ता डा. भेषबहादुर थापा, निलाम्बर आचार्य, सदस्य सूर्यनाथ उपाध्याय, राजन भट्टराई र परराष्ट्रमन्त्री प्रदीप ज्ञवाली समेत सहभागी हुनुहुन्छ ।

प्रधानमन्त्रीले पूर्वप्रधानमन्त्रीहरुबाट सुझाव समेत लिनुभएको छ । प्रधानमन्त्री ओली यही चैत २३ गतेदेखि तीन दिने भ्रमणमा जाँदैहुनुहुन्छ ।