काठमाडौं १० फागुन । नेपाल लिटरेचर फेस्टिभल–२०२५ को बाह्रौँ संस्करण यही फागुन १५ देखि १८ गतेसम्म पोखरामा हुने भएको छ । फेस्टिभलमा देश–विदेशका दुई सयभन्दा धेरै साहित्यकार, राजनीतिज्ञ, लेखक, कलाकार, पत्रकार, सम्पादक एवम् विशिष्ट व्यक्तित्वको उपस्थिति रहनेछ ।
त्यस्तै ५० भन्दा बढी सेसनमा छलफल हनेछ । प्राध्यापक तथा अर्थशास्त्री महेन्द्र पी लामाको प्रवचनसँगै फेस्टिभल शुरु हुनेछ । अध्यात्म र सङ्घर्षमाथि मनीषा कोइराला र विजय कुमारको विशेष संवाद हुनेछ । प्रोजेक्ट सारङ्गीअन्तर्गत किरण नेपालीको नेतृत्वमा सामूहिक प्रस्तुति हुनेछ ।
त्यस्तै नेपाली सङ्गीतका पप–सम्राट ओमविक्रम विष्टको प्रस्तुति रहने छ भने साङ्गीतिक समूह ‘सोनागी ब्लुज’ले पनि फेस्टिभलमा प्रस्तुति दिनेछ । फेस्टिभल बाराहीघाट लेकसाइडमा हुनेछ । पोखरा महानगरपालिका प्रवर्द्धन रहेको फेस्टिभलमा गण्डकी प्रदेश सरकार सहप्रवद्र्धक छ ।
सन् २०११ देखि नेपाल लिटरेचर फेस्टिभल आयोजना हुन थालेपछि नेपालमा वार्षिक रूपमा दर्जनौँ साहित्यिक महोत्सव हुन थालेको फेस्टिभलका निर्देशक अजित बरालले बताउनुभयो । फेस्टिभलले ‘पब्लिक डिस्कोर्स’लाई बलियो बनाएको बरालको भनाइ छ ।
शुरूवातदेखि नै फेस्टिभलले अग्रज तथा समकालीन लेखकहरूको साथ सहयोग पाएको फेस्टिभलका कार्यकारी निर्देशक नीरज भारीले बताउनुभयो ।
बाह्रौँ संस्करणसम्म आइपुग्दा नयाँ पुस्ताका साहित्यकार, लेखक तथा विचारकलाई प्रोत्साहन गर्ने उद्देश्यसहित मञ्च तयार पारेको आयोजक बुकवर्म फाउन्डेसनले जनाएको छ ।
फेस्टिभल आयोजक सदस्य एवम् पत्रकार भरत कोइरालाले इभेन्टहरूको शहर पोखरामा वर्षेनि हुँदै आएको लिटरेचर फेस्टिभलले शहरको संस्कृति र सभ्यता निर्माण थप योगदान पुर्याएको विश्वास व्यक्त गर्नुभयोे ।
प्रतिक्रिया दिनुहोस्