काठमाडौं १४ माघ । अखिल क्रान्तिकारीको २३ औं सम्मेलनमा विवाद साम्य नहुँदा निर्धारित समयमा मतगणना सुरु नहुने भएको छ । मधेशको मतगणनाको विवाद साम्य भएपनि मसीको विवाद कायम रहेकाले गणना सुरु हुन नसकेको विद्यार्थी नेताहरूले जानकारी गराएका छन् ।

विश्वविद्यालय र विशेष प्रदेशको मतगणना सुरु गर्नुअघि निर्वाचन समितिले कालो मसीले मतदान भएको जानकारी गराएपछि उम्मेदवारका प्रतिनिधिहरूमा विवाद भएको थियो । मतदान गर्ने स्थानमा रातो साइनपेन राखिएको थियो । तर, कालो मसीले पनि मतदान भएको जानकारी निर्वाचन समितिका प्रतिनिधिहरूले जानकारी गराएका थिए ।

संगठनको पूर्व अध्यक्ष पञ्चा सिंहले विवादमा सहमति जुटेका जनाउँदै सोमबार मध्यान्ह १२ बजेबाट गणना सुरु हुने दाबी गरेकी थिइन् । तर, उपमहासचिव जनार्दन शर्मा पक्षले भने मसीको विवाद कायमै रहेकाले गणना सुरु हुन नसक्ने जनाएको छ । संगठनका पूर्व उपाध्यक्ष क्षितिज सापकोटाले मसीको विवादमा सहमति जुट्न नसकि गणना सुरु हुन नसक्ने जानकारी गराए ।

विश्वविद्यालय प्रदेश समिति अन्तर्गत निर्वाचन समितका अर्जुन अधिकारी र उपत्यका विशेष समितिका निर्वाचन समिति सदस्य प्रा।डा। जगत पोखरेलले गएराति विज्ञप्ति निकालेर सोमबार १२ बजेबाट मतगणना सुरु हुने जानकारी गराएका थिए ।

नयाँ कमिटीको लागि शनिबार भएको मतदानमा पार्टी नेताहरू अनुसारको संगठनका प्यानल बनेको थियो । अध्यक्ष पुष्पकमल दाहाल ‘प्रचण्ड’ पक्षधरबाट विजयप्रकाश शर्मा सापकोटाले प्यानल खडा गरेका थिए ।

उपाध्यक्ष नारायणकाजी पक्षबाट उपदेश यादव, उपमहासचिव जनार्दन शर्मा समूहबाट हेमन्त राई, अर्का उपाध्यक्ष वर्षमान पुनपक्षबाट सुदीन पौडेलको नेतृत्वमा प्यानल बनेको छ । विश्वविद्यालय र उपत्यका विशेषको मतगणना हुनु अघि अध्यक्षमा सापकोटाले सबैभन्दा बढी मत पाएका थिए ।