डिसेम्बर २६ः फनल्यान्डका अधिकारीहरूले बिहीबार एउटा तेल ट्यांकरमा छापा मारेका छन्, जसलाई उनीहरूले पानीमुनि रहेको महत्वपूर्ण केबल काट्न संलग्न अनुमान गरिएको छ । यो जहाज रूसको तथाकथित छायाँ बेडामा सामेल रहेको बताइएको छ, जसले प्रतिबन्धलाई छल्न प्रयोग गरिन्छ।

फिनल्यान्ड र एस्टोनियाबीच बिजुली जोड्ने एस्टलिंक २ सबमरीन नामक केवल बुधबार काटिएको फिनल्यान्डको प्रहरीले जनाएको छ। यो घटना पानीमुनि रहेको पूर्वाधारमा भइरहेको विघटनको ताजा घटना हो, जसलाई तोडफोडका कार्यको रूपमा अनुसन्धान भइरहेको छ। फिनल्यान्डका अधिकारीहरूले बिहीबार चार वटा अन्य डाटा ट्रान्समिट गर्ने केबलहरू पनि क्षतिग्रस्त भएको बताएका छन्।

पछिल्ला केही महिनाहरूमा अन्य महत्वपूर्ण पानीमुनि रहेका केबलहरू पनि काटिएका छन् ।

गत महिना बाल्टिक सागरमा दुई फाइबर अप्टिक केबलहरू पनि काटिएको घटनालाई जर्मनीका रक्षा मन्त्रीले तोडफोडजन्य कार्य भनेका थिए। तीमध्ये एउटा केबल फिनल्यान्ड र जर्मनी जोड्ने थियो भने अर्को लिथुआनिया र स्विडेनबीच चल्थ्यो । यी सबै देश नेटो गठबन्धनका सदस्य हुन्।

रुसी जहाजहरू बाल्टिक र उत्तरी समुद्रमा महत्वपूर्ण पूर्वाधार भएको स्थानको नजिक देखिएका छन्। दर्जनौं रुसी ट्यांकरहरूले प्रतिबन्ध छल्न अन्य झन्डा अन्तर्गत यात्रा गर्न थालेको न्यूयोर्क टाइम्सले जनाएको छ ।

फिनल्यान्ड प्रहरीले पछिल्लो केबल कटौतीलाई “गम्भीर तोडफोड” भनेका छ । बिहीबार जारी प्रहरीको विज्ञप्तिमा भनिएको छ, अधिकारीहरूले ईगल एस ट्यांकर नियन्त्रणमा लिएका छन् । यो दक्षिण प्रशान्तको कुक द्वीपसमूहमा दर्ता भएको जहजा हो । जहाज रुसको सेन्ट पिटर्सबर्गबाट इजिप्टको पोर्ट सईदतर्फ जाँदै गर्दा फिनल्यान्डको समुन्द्री जल क्षेत्रमा प्रवेश गरेको थियो।

“हामी यो जहाज रूसको छायाँ बेडाको सदस्य हो भन्ने अनुमान गर्दैछौं,” फिनल्यान्डका भन्सार प्रमुख सामी रक्षितले पत्रकार सम्मेलनमा बताएको विभिन्न समाचार माध्यमले उल्ल्ेख गरेका छन् ।
फिनल्यान्डका प्रधानमन्त्री पेटेरी ओरपोले भने, “ईगल एस रुससँग प्रत्यक्ष रूपमा जोडिएको प्रमाण नभए पनि, यो घटनाले बाल्टिक राष्ट्रहरूको सम्भावित हस्तक्षेपप्रति कमजोर अवस्थालाई देखाउँछ।”

युरोपेली आयोगका अध्यक्ष उर्सुला भोन डर लेयनले फिनल्यान्डको “छिटो कार्य”को प्रशंसा गरिन्। “हिजोको बाल्टिक सागर घटनाले ईयू पूर्वाधारमाथिको खतरालाई देखाउँछ। हामी मिलेर युरोपको महत्वपूर्ण पूर्वाधारको सुरक्षा बढाउनेछौं।”
एस्टोनियाका प्रधानमन्त्री क्रिस्टन मिचलले केबल काटिएको घटनाको प्रतिवादमा फिनल्यान्डसँग समन्वय गरिएको बताए।
काटिएको एस्टलिंक २ केबलले फिनल्यान्ड र एस्टोनियामा धेरै प्रभाव नपरेको बताइएको छ । एस्टोनियाको आर्थिक मामिला तथा सञ्चार मन्त्रालयकी प्रवक्ताले सार्वजनिक रूपमा कुनै प्रभाव नपर्ने बताइन्।