काठमाडौं, २२ फागुन । कान्तिपुरविरुद्ध परेको अदालतको अवहेलना मुद्दाको सुनुवाई गर्न सर्वोच्च अदालतको संयुक्त इजलासले मुद्धालाई पूर्ण तथा बृहत् पूर्ण इजलासमा पठाएको छ।

संयुक्त इजलासले सो मुद्धा संवैधानिक व्याख्याको विषय भएको भन्दै बृहत् पूर्ण इजलासमा पठाएको हो।

आइतबारदेखि जारी बयान टुंग्याउँदै मंगलबार सर्वोच्चले यस्तो आदेश सुनाएको हो। न्यायाधीशद्वय बमकुमार श्रेष्ठ र डम्बरबहादुर शाहीको इजलासमा तीन दिनदेखि बयान चलेको थियो।

विपक्षीहरुले बयानका क्रममा अदालतको प्रतिष्ठामा आँच आउने कार्य नगरेको बताएको सर्वोच्चको आदेशमा भनिएको छ।

‘अदालतको अहवेलना सम्वन्धी विधिशास्त्रीय सिद्धान्त र यसको मान्यतालाई बृहत् व्याख्या हुनुपर्ने देखियो’, आदेशमा भनिएको छ, ‘विषयको गम्भीरतालाई ध्यान दिई उक्त मुद्दाको सुनुवाइ पूर्ण वा बृहत् पूर्ण इजलासबाट हुनुपर्ने देखिन्छ।’

आइतबार कान्तिपुर दैनिकका निर्देशक स्वस्तिका सिरोहियाको बयान लिइएको थियो भने बाँकी कान्तिपुर मिडिया गुप्रका अध्यक्ष कैलाश सिरोहिया, प्रधान सम्पादक सुधीर शर्मा र संवाददाता कृष्ण ज्ञवालीको बयान मंगलबार लिइएको थियो।

कान्तिपुरमा प्रकाशित ‘प्रधानन्यायाधीश पराजुलीको चार वटा जन्ममिति’ शीर्षकको समाचारबाट अदालतको अवहेलना भएको भन्दै अधिवक्ता तोयानाथ ढुंगानाले गत फागुन १३ गते सर्वोच्चमा मुद्दा दायर गरेका थिए।

उक्त मुद्दामा पहिलो सुनुवाइ प्रधानन्यायाधीश गोपाल पराजुली आफैंले गर्दै विपक्षीहरुलाई तीन दिनभित्र उपस्थित हुन आदेश जारी गरेका थिए।