काठमाडौं, १ भदौ । नेकपा एमालेका वरिष्ठ उपाध्यक्ष ईश्वर पोखरेलले संविधान संशोधनका बारेमा पार्टीमा कुनै छलफल नभएको बताउनुभएको छ । एबीसी टेलिभिजनका प्रधानसम्पादक शुभशंकर कँडेलसँग आउटलुक कार्यक्रममा बोल्दै उहाँले संविधानको संसोधन बारे आफ्नो पार्टी भित्र कुनैपनि छलफल नभएको बताउनुभएको हो । संविधान संसोधन बारे पार्टीका महासचिव शंकर पोखरेलले बोलेका कुरा ब्यक्तिगत भएको बताउनुभयो ।

वरिष्ठ उपाध्यक्ष पोखरेलले मुलुकलाई विकास, समृद्धि र स्थिरताको बाटोमा अगाडि बढाउन काँग्रेस र एमाले मिलेर सरकार बनेको बताउनुभयो । अहिलेको सरकारले केही न केही सकारात्मक कार्य गर्ने समेत उहाले दावी गर्नुभयो । उहाँले राष्ट्रिय मुद्दामा, राष्ट्रलाई संकट परेको बेला ऐतिहासिक परिवर्तनका क्षणमा कांग्रेस र कम्युनिष्टको सहकार्य हुने गरेको भन्दै कांग्रेस र एमालेको सम्बन्ध आयामिक रहेको दावी गर्नुभयो ।

उहाले कार्यक्रममा जनभावना के कुरासँग गाँसिएको छ भन्ने कुरामा पनि सरकारले ध्यान दिनुपर्ने र समाजमा के मुद्दाले असर गरिरहेको छ भन्ने बुझ्नु पर्ने समेत बताउनुभयो । उपाध्यक्ष पोखरेलको अन्तर्वार्ता शानिबार राती ९ बजे र आइतबार विहान ७ बजे पुन प्रसारण हुनेछ । यो अन्तर्वार्ता एबीसी टिभी नेपाल युट्युव च्यानलमा पनि हेर्न सकिनेछ ।