काठमाडौं ३० साउन । नेकपा एमालेले राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समितिको नेतृत्वमा सांसद ठाकुर गैरेलाई अघि सार्ने भएको छ।

एमाले संसदीय दलकी सचेतक सुनीता बरालले सांसद गैरेलाई सभापतिमा अघि सार्ने तय भएको नेपालखबरलाई जानकारी दिइन्।

संघीय संसदका दुई संयुक्त समितिमा सत्तारूढ नेपाली कांग्रेससँग भागबन्डा हुँदा यस समितिको नेतृत्व एमालेको भागमा परेको छ। गैरे प्रतिनिधि सभाका सदस्य हुन्।

यस समितिको नेतृत्वका लागि राष्ट्रिय सभाबाट तुलसाकुमारी दाहाल र प्रतिनिधि सभाबाट ठाकुर गैरेका नाममा एमालेभित्र छलफल भएको थियो। अन्तिममा एमाले नेतृत्वले गैरेलाई अघि सार्न सहमति दिएको हो।

संसदीय सुनुवाइ समितिको नेतृत्व भने कांग्रेसले पाउने भएको छ। कांग्रेसले सांसद ईश्वरीदेवी न्यौपानेलाई अघि सार्ने भएको छ। उनी पनि प्रतिनिधि सभाकै सदस्य हुन्।

सभापतिको निर्वाचन भोलि बिहीबार तोकिएको छ। आज उम्मेदवारको मनोनयन दर्ताको कार्यक्रम छ। आज २ बजे उम्मेदवारी दर्ता गर्न लागेको सांसद गैरेले  बताए।