रुपन्देही, ११ फागुन। नेपालकै सर्वाधिक राशिको प्रथम बुटवल खुला लनटेनिस प्रतियोगिता २०७४ आजदेखि बुटवलमा शुरु भएको छ ।

देशैभरका विभिन्न क्लब, विभागीय टोली र खेलाडीको जमघटबीच शुरु भएको प्रतियोगितामा ८६ खेलाडीले सहभागिता जनाएका छन् । बुटवल लनटेनिस क्लबको आयोजनामा एन्फा टेक्निकल सेन्टर देवीनगरमा रहेको कोर्टमा प्रतियोगिता शुरु भएको हो ।

उद्घाटन खेलमा मेन्स सिंगलतर्फ जीतेन्द्र परियार अभिषेक पाठकलाई ६–०,६–० ले हराउँदै क्वाटर फाइनलमा प्रवेश गरेका छन् । यस्तै विकास खड्का सर्वरमियालाई ६–०,६–०, प्रदीप खड्का अञ्जन थिङलाई ६–१, ६–१ तथा सन्तोष खत्री भीष्म काउचलाई ६–१, ६–२ बाट पराजीत गर्दै क्वाटरफाइनलमा प्रवेश गरेका छन् ।

यसैगरी मेन्स ५५ माथि उमेर समूहमा कृष्णराज घलेले अब्दुल सहमतलाई ६–०, ६–१ बाट हराएर सीधै सेमिफाइनलको यात्रा तय गरेका छन् । पैँतीस वर्ष उमेर समूहमाथिको खेलमा राजन बिजुक्छेले बालकृष्ण अर्याललाई ६–० र ६–१ ले पराजित गरेका छन् भने अशोक गुरुङबाट वाकओभर पाएर सञ्जय श्रेष्ठले अघिल्लो चरणको यात्रा तय गरेका छन् ।

यस्तै फन डबलतर्फ कमलबहादुर भण्डारी र अनिल सेञ्चुरी आत्माराम कार्की र बालकृष्ण अर्याललाई ८–० ले हराउँदै दोस्रो चरणमा प्रवेश गरेका छन् । अर्को सहज जीत हात पार्ने क्रममा मनोज राना र शोनमणि चौधरी कृष्णराज घले र इशा पौड्याललाई ८–० ले हराउँदै दोस्रो चरणमा प्रवेश गरे ।

उद्घाटन खेलमा न्यून दर्शकको सहभागितामा भएको फन डबलतर्फ पुनबहादुर खनाल र रामु विकले धर्मसिंह लामिछाने र विष्णु चापागाईंलाई ८–० ले पराजित गर्दा विकास खड्का र अर्जुन गुरुङको जोडीले पूर्वउपप्रधानमन्त्री कमल थापा र मनोहरदास मललाई ८–१ ले पराजित गर्दै अघिल्लो चरणको यात्रा तय गरेका छन् ।

प्रतियोगितामा फन डबल, मेन्स सिंगल, ३५, ४५ र ५५ वर्षमाथि र महिला सिंगल्स गरी छ विधाका खेल खेलाइएको क्लबका अध्यक्ष गोपाल ज्ञवालीले जानकारी दिनुभयो । यही फागुन १५ गतेसम्म चल्ने प्रतियोगिताअन्तर्गत शनिबार पनि विभिन्न विधाका पहिलो र दोस्रो चरणका खेल हुने छ ।