काठमाडौं २ फागुन । नेकपा माओवादी केन्द्रको मंगलबार सुरु विधान महाधिवेशनमा बुधबारसम्म १३ समूहले सुझाव प्रस्तुत गरेका छन् ।

प्रस्तावित विधानमाथि समूहगत छलफल गरेपछि टोली नेताले विधान महाधिवेशन हलमा निष्कर्ष प्रस्तुत गरेका हुन् । अब बाँकी ७ समूहको सुझाव बिहीबार प्रस्तुत हुने नेताहरुले बताएका छन् ।

माओवादीले प्रस्तावित विधानमाथि छलफल गर्न २० समूह बनाएको छ । बुधबार प्रस्तुत भएको सुझावहरुमा नेतृत्व चयन प्रणाली प्रत्यक्ष निर्वाचित गर्नुपर्ने, कमिटीको आकार सानो र छरितो बनाउनुपर्नेलगायत छन् । एक सहभागीका अनुसार विभिन्न समूहले किसिमकिसिमका सुझाव पेश गरेका छन् ।

सुझाव पेश गर्ने क्रममा कञ्चन खनालले महाधिवेशन प्रतिनिधि पार्टी समिति सदस्यबाट निर्वाचित भएर आउनुपर्ने र सहिद, वेबत्ता र घाइतेका सदस्याका प्रतिनिधिलाई महाधिवेशनमा परिवेक्षकका रुपमा राख्नुपर्ने सुझाव दिए । उहाँले पार्टीलाई छरितो एवं जनमैत्री बनाएर सबै क्षेत्र र समूदायलाई समेटेर लैजानुपर्ने बताए ।

सरल सहयात्रीले प्रस्तावनालाई छरितो बनाउनुपर्ने, पार्टी र निर्वाचन चिह्न फेर्न सुझाव आएको उल्लेख गर्दै सङ्गठनात्मक सिद्धान्तलाई छोटो बनाउनुपर्ने र पार्टी सदस्य दिँदा सरल बनाउनुपर्ने बताए ।

युवराज चौलागाईले प्रत्यक्ष निर्वाचनमा पार्टी समितिलाई लैजानुपर्ने सुझाव पेश गर्दै पार्टीको स्थायी समिति सदस्य विधानमा उल्लेख गर्न नपर्ने बताए।

मङ्गलबारदेखि काठमाडौँको कमलाधिस्थित प्रज्ञा प्रतिष्ठानमा सुरु भएको अधिवेशनमा सहभागीलाई विभिन्न २० समूहमा विभाजन गरिएको थियो । भोलि ७ समूहले सुझाव पेश गर्ने कार्यक्रम रहेको छ । बैठक भोलि विहान ११ बजे पुनः बस्नेछ ।