काठमाडौं ७कात्तिक । राजा महाराजाहरुले झैं गणतन्त्तका राष्ट्रपतिले पनि सार्वसाधारणदेखि विशिष्ट भनिएका कर्मचारी तथा राजननीतिज्ञलाई आफूबाट टिका थाप्न आउन आह्वान गरेका छन् । राष्ट्रपति रामचन्द्र पौडेलले आज विशिष्ट पदाधिकारीदेखि सर्वसाधारणलाईसमेत विजया दशमीको टीका लगाइदिने भएको राससले जनाएको छ ।

राष्ट्रपति कार्यालयले विशिष्ट र सर्वसाधारणका लागि छुट्टैछट्टै समयको व्यवस्थापन गरेर टीका र प्रसाद ग्रहणको व्यवस्था मिलाएको हो।

राष्ट्रपतिबाट टीका प्रसाद ग्रहण गर्न इच्छुक सम्माननीय, माननीय, उपप्रधानमन्त्री तथा मन्त्री, प्रदेश प्रमुख, न्यायाधीश, सांसद, संवैधानिक निकायका पदाधिकारी तथा निजामती, जङ्गी, प्रहरीतर्फका अधिकृतस्तरसम्मका राष्ट्र सेवकका लागि अपराह्न २ देखि ३ बजेसम्म समय तोकिएको छ।

अन्य सर्वसाधारणका लागि अपराह्न ३ देखि ५ बजेसम्म राष्ट्रपतिबाट टीका प्रसाद ग्रहण गर्न सक्ने व्यवस्था मिलाइएको राष्ट्रपति कार्यालयका प्रवक्ता शैलजा रेग्मी भट्टराईले जानकार दिइन्।

राष्ट्रपतिबाट टीका प्रसाद ग्रहण गर्ने महानुभावले मर्यादित पोसाकमा १ नं प्रवेशद्वारबाट राष्ट्रपति कार्यालय प्रवेश गर्नुपर्नेछ।