काठमाडौं २६ माघ । प्रदेश ३ को एमाले संसदीय दलको नेतामा डोरमणी पौडेल विजयी भएका छन् । पौडेलले दलको चुनावमा ५८ मत खसेकोमा ३४ मत पाएर विजयी भएका हुन् । प्रतिस्पर्धी पार्टी उपाध्यक्ष समेत रहेकी अष्टलक्ष्मी शाक्यले २४ मत मात्र प्राप्त गरिन । एमाले प्रदेश सभा संसदीय दलमा ३ नं. सबैभन्दा पेचिलो बनको थियो । मुख्यमन्त्रीको आकांक्षीहरु माधव नेपाल पक्षीय शाक्य, राजेन्द्र पाण्डे, पशुपति चौलागाईं र अरुण नेपाल रहेका थिए । त्यसो त पूर्व मेयर केशव स्थापितले पनि आफूलाई दलको नेता बनाउनु पर्ने लविंग गरेका थिए । अन्तमा चर्चामा नरहेका हेटौंडाका डोरमणि पौडेल पार्टी संस्थापन पक्षबाट दलको नेता बन्दै मुख्य मन्त्री बन्ने भएका छन् ।

को हुन डोरमणी पौडेल ?

नेपाल नगरपालिकाका संघको २०५४ सालदेखि हालसम्म अध्यक्ष रहेका पौडेल तत्कालिन हेटौंडा नगरपालिकाको २०४८ र २०५४ मा निर्वाचित मेयर हुन् । २ पटक नगरपालिकाको नेतृत्व गरेका थिए ।

राज्य पुनर्संरचना उच्चस्तरीय सुझाव आयोगमा सदस्य भएर काम गरिसकेका पौडेल, अन्तर्राष्ट्रिय संस्था यूसीएलजीको उपाध्यक्ष, सिटीनेटको कार्यकारी सदस्य, मकवानपुर बहुमुखी क्याम्पसको अध्यक्ष, शहीद स्मारक विकास समितिको अध्यक्ष समेत भैसकेका छन्।

काठमाडौंको तत्कालिन फर्पिङ्ग गाविसमा वि।स। २००२ साल चैत १५ गते जम्मेका उनको स्थायी ठेगाना मकवानपुरको हेटौंडा उपमहानगरपालिका–११, नवलपुर हो । मायानाथ पौडेल र कुलकुमारी पौडलका सुपत्र डोरमणीले मानविकी संकायमा स्नातक सम्मको औपचारिक अध्ययन गरेका छन् ।