एजेन्सी, १४ चैत । मानहानिको मुद्दामा दुई वर्षको जेल सजाय सुनाइएपछि गत हप्ता लोकसभाको सदस्य (सांसद पद)बाट बर्खास्त राहुल गान्धीलाई सरकारी निवास खाली गर्न सूचना जारी गरिएको छ ।

लोकसभा सचिवालयका उपसचिव मोहित राजनले सोमबार जारी गरेको पत्रमा गान्धीलाई एक महिनाभित्र सरकारी निवास खाली गर्न भनिएको छ ।

गत बिहीबार सुरतको एक अदालतले ४ वर्ष पुरानो मानहानि मुद्दामा गान्धीलाई दुई वर्ष जेल सजायको फैसला सुनाएको थियो भने त्यसको भोलिपल्ट भारतीय लोकसभा सचिवालयले सूचना जारी गर्दै राहुलको लोकसभा सदस्य पद खारेज गरिएको जानकारी दिएको थियो ।

सन् २०१९ मा कर्नाटक राज्यको कोलारमा आयोजित चुनावी सभामा नेता गान्धीले ‘चोर मोदीहरू’ भनेका थिए । उनले भगौडा व्यापारी नीरब मोदी र ललित मोदीलाई लक्षित गर्दै त्यो भनेका थिए । नेता गान्धीको उक्त अभिव्यक्तिले मोदी थर भएका सबैको मानहानी भएको जिकिर गर्दै भारतीय जनता पार्टी (भाजपा)का विधायक एवम् गुजारत राज्यका पूर्वमन्त्री पूर्णेश मोदीले उनीविरूद्ध मुद्दा दायर गरेका थिए ।