काठमाडौँ, ११ फागुन । राष्ट्रपति निर्वाचनमा विगतमा नेपाली कांग्रेसको नेतृत्वमा बनेको पाँच दलीय गठबन्धन ब्युँताउनेबारे सघनरूपमा छलफल भएको छ । कांग्रेस नेताहरूले राष्ट्रपति निर्वाचनका लागि पुरानै गठबन्धनलाई ब्युँताउनेबारे अन्तिम निष्कर्षका लागि तयारी थालेको बताएका छन् । यसबारेमा औपचारिक समझदारी भएमा पुरानै गठबन्धन ब्युँतने उनीहरूको दाबी छ ।

कांग्रेस सभापति शेरबहादुर देउवासहिताका नेताहरूले तत्कालीन गठबन्धनका सबै दलका नेताहरूसँग बुधबार चरणबद्ध छलफलपछि विगतको पाँचदलीय गठबन्धन ब्युँताउने सहमति बनाउनुपर्ने बताएका हुन् । बुधबार साँझ प्रधानमन्त्रीको सरकारी निवास बालुवाटारमा प्रधानमन्त्री एवम् नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’सँगको भेटपछि कांग्रेसका एक नेताले भने, “आज दिनभरको भेटघाट र छलफलपछि अब विगतको पाँच दलीय गठबन्धन ब्युँताउने निष्कर्षमा पुगेका छौँ । राष्ट्रपतिको निर्वाचनमा त्यही गठबन्धनबाट नेपाली कांग्रेसले उम्मेदवारी दिन समझदारी बनेको छ । भोलि दिनभर छलफलपछि हामी बेलुकासम्म सबै विषयमा टुंगो लगाइसक्छौँ ।”

कांग्रेस सभापति देउवाले बुधबार नेकपा (एकीकृत समाजवादी) जनता समाजवादी पार्टी (जसपा) र लोकतान्त्रिक समाजवादी पार्टी (लोसपा)का नेताहरूसँग आफ्नै निवासमा चरणबद्ध छलफल गरेका थिए । त्यसपछि बेलुका कांग्रेसका शीर्ष नेताहरूसहित बालुवाटार पुगेर प्रधानमन्त्री प्रचण्डसँग निर्णायक वार्ता भएको थियो । त्यसक्रममा राष्ट्रपति निर्वाचनमा विगतको पाँच दलीय गठबन्धन ब्युँताउनेबारे सघनरूपमा छलफल भएको ती नेताले बताए ।

बुधबार साँझ प्रधानमन्त्रीको निवासमा भएको छलफलमा कांग्रेसबाट सभापति देउवा, वरिष्ठ नेता रामचन्द्र पौडेल, उपसभापति पूर्णबहादु खड्का, महामन्त्री गगन थापा, एकीकृत समाजवादीका अध्यक्ष माधवकुमार नेपालसहित नेताहरू सहभागी थिए ।