काठमाडौँ २३पुस । सत्तारुढ नेकपा माओवादी केन्द्र ले बृहत् वाम एकताको पहलका गर्ने भन्दै वार्ता टोली गठन गरेको छ । प्रधानमन्त्री समेत रहेका अध्यक्ष पुष्पकमल दाहाल प्रचण्डको अध्यक्षतामा शनिबार बसेको केन्द्रीय कार्यालयको बैठकले उपाध्यक्ष कृष्णबहादुर महराको नेतृत्वमा ५ सदस्यीय वार्ता टोली गठन गर्ने निर्णय गरेको हो ।

वार्ता टोलीमा महासचिव देवप्रसाद गुरुङ, उपमहासचिवहरु गरिराजमणि पोखरेल, जनार्दन शर्मा र शक्तिबहादुर बस्नेत रहेका छन् ।

पार्टी एकताकै विषयमा प्रचण्डसँग नेपाल समाजवादी पार्टीका अध्यक्ष बाबुराम भट्टराईले शनिबारमात्रै छलफल गरेका थिए । केही दिन पहिले दल नेकपा एकीकृत समाजवादीले पनि वाम एकताको पहलका लागि सचिवालयलाई जिम्मा दिइसकेको छ । चुनावअघि नै एकीकृत समाजवादी र माओवादीले एकता संयोजन समिति बनाएका थिए ।

माओवादी बैठकले अध्यक्ष पुष्पकमल दाहाल प्रचण्डको नेतृत्वमा गठित सरकारलाई विश्वासको मत दिन प्रतिनिधिसभामा रहेका सम्पूर्ण दल तथा स्वतन्त्र सांसदहरुलाई अपिल गरेको छ ।

प्रधानमन्त्री प्रचण्डले २६ मंगलबार प्रतिनिधिसभामा विश्वासको मतको प्रस्ताव पेस गर्ने कार्यसूची रहेको छ । प्रचण्ड पुस १० गते प्रधानमन्त्रीमा नियुक्त भएका थिए । प्रचण्डको सरकारलाई नेकपा एमाले, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टीलगायत ७ वटा दल र ३ स्वतन्त्र सांसदको समर्थनमा रहेको छ ।