काठमाडौं, पुष ७ ।

प्रतिनिधि सभामा सदस्यमा दुई सय ७५ जना सांसद निर्वाचित छन् । निर्वाचित सांसदले मासिक तलबभत्ता ६६ हजार ७० रुपैयाँसहित विभिन्न सेवा, सुविधा पाउँनेछन् । संघीय संसद सचिवालयले ज्येष्ठ सदस्यको शपथ ग्रहण लगायत सर्वदलीय बैठकको तयारी अघि बढाएको जनाएको छ । निर्वाचन आयोगले दिएको निर्वाचित सांसदको उमेरको आधारमा ज्येष्ठ सदस्यलाई सबैभन्दा पहिले राष्ट्रपतिले शपथ गराउने व्यवस्था छ । त्यसपछि, सबै दलहरुसँग सम्पर्क स्थापित एवम् बैठकको तयारी संसद सचिवालयले गर्छ । संसदको बैठक पुषभित्रै बसिसक्नुपर्ने संवैधानिक व्यवस्था छ । राष्ट्रपति विद्यादेवी भण्डारीले संविधानको धारा ७६ को २ बमोजिम दुई वा दुईभन्दा बढि दलहरु मिलेर सरकार गठन गर्ने अवस्थामा पुष १० गतेभित्र सरकार गठनको प्रक्रिया अघि बढाउन आव्हान गरिसकेको अवस्था छ ।

शपथको दिन कानुनको संग्रह, डायरी, झोला, कलम, शपथ राख्ने फाइल दिइनेछ । विगतमा सांसदको झोला दाताको सहयोगमा वितरण गर्ने गरिएकोमा यो पटक भने कुनै दातालाई गुहारिएको छैन । सांसदलाई दिइने डायरी छुट्टै छापिएको सचिवालयले जनाएको छ । सांसदलाई मासिक अथिति सत्कार भत्ता उपलब्ध गराइनेछ । नवनिर्वाचित सांसदले संसदमा जनताका आवाज उठाउने प्रतिबद्धता विजयपछि जनाउदै आएका छन् ।

काठमाडौं उपत्यकामा घर नभएका प्रत्येक सांसदले घरभाडाबापत मासिक १८ हजार रुपैयाँ, घर हुने सांसदले घर मर्मत सम्भारबापत मासिक ८ हजार रुपियाँ पाउनेछन् । बिजुली, पानी, टेलिफोन, पत्रपत्रिकाबापत मासिक ३ हजार पाउनेछन् । इन्टरनेटसहित एउटा टेलिफोन लाइन जडान गर्न लाग्ने धरौटी तथा अन्य खर्च पनि सचिवालयले उपलब्ध गराउनेछ । सांसद बिमारी परेको खण्डमा सरकारकै खर्च हुन्छ । नियमित सेवन गर्नुपर्ने औषधि खर्च पनि सचिवालयले उपलब्ध गराउनेछ । निर्वाचित प्रतिनिधिले चुनावअघि जनतासामु व्यक्त गरेका प्रतिबद्धता पुरा गर्न संसदलाई चुस्त, दुरुस्त ढंगबाट अघि बढाउनुपर्ने बताएका छन् ।

सांसदले नियमित पारिश्रमिकबाहेक थप रकम चाहिएमा आफूले पाउने तलबको बढिमा तीन महिनाको तलबबापतको पेस्की पाउने व्यवस्था छ । बैठक बस्दा दैनिक एक हजार यातायात खर्च र एक हजार बैठक भत्ता दिइन्छ । सत्ता पक्षको नेता, विपक्षी दलका नेता, प्रमुख सचेतक, सचेतक, संसदीय समितिका सभापतिले गाडी सुविधा पाउनेछन् ।